Shtëpia e Bardhë: Izraeli është pajtuar për pauzë 4-orëshe në ditë në veri të Gazës

Shtëpia e Bardhë tha se Izraeli është pajtuar për pauza katërorëshe humanitare çdo ditë në veri të Gazës, ku po lufton me militantët palestinezë të Hamasit.

Administrata e presidentit amerikan, Joe Biden, tha se ka siguruar një rrugë të dytë për civilët që të ikin nga luftimet.

Presidenti Biden i kishte kërkuar kryeministrit izraelit, Benjamin Netanyahu, që të vendoste pauza ditore. Këtë kërkesë ai e kishte bërë gjatë një bisede telefonike që zhvilloi në fillim të kësaj jave.

Zëdhënësi i Këshillit të Sigurisë Kombëtare në SHBA, John Kirby, tha se pauza e parë humanitare do të shpallet të enjten. Sipas tij, izraelitët janë zotuar se do të njoftojnë për pauza katërorëshe të paktën tre orë para se të nisë pauza humanitare.

Biden u tha gazetarëve se ai u ka kërkuar izraelitëve për një “pauzë më të gjatë se tre ditë” gjatë negociatave për lirimin e disa pengjeve që po mbahen nga Hamasi, por përjashtoi mundësinë e një armëpushimi të përgjithshëm.

Sekretari amerikan i Shtetit, Antony Blinken, ka paralajmëruar Izraelin javën e kaluar se po rrezikon të shkatërrojë mundësinë për paqe nëse nuk vepron menjëherë për të përmirësuar kushtet humanitare në Gazë për civilët palestinezë, teksa Izraeli po intensifikon luftën kundër Hamasit.

Në thirrjen drejtuar Izraelit për pauzë të operacioneve ushtarake në Gazë për të lejuar dërgimin e menjëhershëm të ndihmës, Blinken tha se situata mund të shtyjë palestinezët drejt radikalizmit dhe të prishë mundësitë për bisedime eventuale të paqes pas përfundimit të konfliktit.

Lufta mes Izraelit dhe Hamasit u nxit pasi ky grup militant palestinez më 7 tetor sulmoi jugun e Izraelit duke vrarë 1.400 persona dhe duke marrë pengje mbi 200 të tjerë.

Që atëherë, Izraeli ka sulmuar nga toka dhe ajri Rripin e Gazës, që është shtëpi e 2.3 milionë palestinezëve.

Izraeli u ka bërë thirrje banorëve në veri të Gazës që të largohen për në jug, përderisa po vazhdon lufta me Hamasin.

Sipas autoriteteve shëndetësore në Gazën e udhëhequr nga Hamasi, si pasojë e luftimeve janë vrarë mbi 10.000 palestinezë.

LEXONI GJITHASHTU:

• U mbajt peng për 12 ditë, lirohet babai i futbollistit të Liverpool
• Studimi për kancerin kolorektal/ ISHP: Nga 2015 deri në 2021 rastet në rritje