Shtyhet kompensimi i pronarëve! Afati i fundit viti 2028, ATP kërkon më shumë kohë

Sipas rishikimit të fundit, afati për shqyrtimin e aplikimeve për ish-pronarët dhe kohëzgjatja e fondit të kompensimit do të zgjatet përtej viteve të parashikuara aktualisht në ligjin në fuqi.

Agjencia e Trajtimit të Pronave (ATP) do të vazhdojë të shqyrtojë dosjet deri në vitin 2027, ndërsa procesi i kompensimit të pronarëve pritet të zgjasë deri në vitin 2028. Ligji aktual parashikonte që shqyrtimi i dosjeve të përfundonte brenda vitit 2024, ndërsa kompensimi fizik dhe monetar të përfundonte deri në vitin 2026.

Ministria e Drejtësisë ka argumentuar se është e pamundur të respektohen afatet fillestare, duke theksuar se procesi është i ngadalësuar nga disa faktorë, përfshirë vëllimin e madh të dosjeve dhe sfidat që lidhen me procese të gjata gjyqësore.

Në lidhje me procesin e vendimmarrjes, ATP ka përmbyllur deri tani procedimin administrativ për vetëm 115 dosje, që përfaqësojnë 1.6% të kërkesave ende të patrajtuara.

Një tjetër problematikë e identifikuar është ecuria e ngadaltë e proceseve gjyqësore, të cilat për shkak të mungesës së vendimmarrjes kanë lënë pezull qindra praktika.

Sipas Ministrisë së Drejtësisë, shtyrja e afateve do t’u japë qytetarëve mundësinë që kërkesat e tyre të trajtohen në rrugë administrative nga ATP, duke shmangur vonesat e gjata që lindin në proceset gjyqësore.

LEXONI GJITHASHTU:

• Ulet tatimi, sa pritet të mbajë shteti gjatë shit-blerjes së një prone
• Çmimet e apartamenteve në rritje, emigrantët dhe familjet e reja, blerësit kryesorë