Gjobë 3 avokatë pasi nuk u paraqitën në gjyqin ndaj Arbër Çekaj, gazetari i Euronews Albania sjell detajet

Shtyhet seanca e parë në Apelin e Posaçëm për Arbër Çekajn, Donaldo Lushajn dhe Armando Pezakun.

Seanca e sotme është shtyrë për shkak të mungesës së avokatëve të Arbër Çekajt dhe Donado Lushaj. Për mungesën në gjykatë kanë marrë gjobë nga 50 mijë lekë avokatët Maks Haxhia, Faslli Ceka dhe Dritan Jahaj. I vetmi që u paraqit në seancë ishte avokati i Armando Pezakut.

Gazetari i Euronews Albania Eni Ferhati tha se gjoba ndaj avokatëve erdhi në momentin që nga Gjykata është konstatuar se mungesa e tyre ka ndodhur pa ndonjë arsye.

“Në këtë periudhë për shkak të pandemisë ka pasur shtyrje të gjyqeve, por gjoba është një masë parandaluese pasi ka raste që nga gjykata është kërkuar heqja e licencës për avokatë që zvarrisin proceset gjyqësore”, raportoi gazetari i Euronews Albania.

Arbër Çekaj, Donaldo Lushaj dhe Armando Pezaku akuzohen për trafikimin e 613 kg kokainë që vinte nga Kolumbia e fshehur mes bananeve.

Më 15 shtator Gjykata e Posaçme dënoi me 21 vite burg Arbër Çekajn, ndërsa për shkak të gjykimit të shkurtuar ai përfundimisht do të vuajë 14 vite heqje lirie. Çekaj u shpall fajtor si porositësi i 613 kilogramëve kokainë që u kapën në Maminas dy vite më parë.

Gjithashtu administratori i “Arbi Garden”, Donald Lushaj, u dënua me 16 vite burg, por dënimi i ulet për shkak të gjykimit të shkurtuar dhe përfundimisht do të vuajë 10. 8 vite burg.

Ndërsa për shoferin, Armando Pezaku, u shqiptua dënimi me 13 vite burgim, ndërsa i ulet në 8.8 vite për shkak të gjykimit të shkurtuar.