Shumica e shqiptarëve besojnë se PS do ta çojë deri në fund mandatin e tretë

Shumica e shqiptarëve besojnë se Partia Socialsite do ta vijojë deri në fund mandatin e tretë qeverisës duke përjashtuar mundësinë e zgjedhjeve të parakohshme, ngjashëm besojnë edhe 40.7% e votuesve të PD-së.

Kështu rezultoi nga sondazhi i kompanisë MRB për Euronews Albania, ku 70.7% e të pyeturve thanë se besojnë që PS “do ta përfundojë mandatin”, ndërsa 24.6 thanë se “nuk do ta përfundojë dhe do të ketë zgjedhje të parakohshme” – 4.7% nuk u përgjigjën.

Nga analiza e detajuar ra në sy se nga ata që u përgjigjën se PS do ta çojë deri në fund mandatin e saj të tretë 96.7% ishin votues të PS-së dhe 40.7% votues të PD-së.

Prej votuesve të PD-së, 53.1% besojnë se do të ketë zgjedhje të parakohshme.

Për sa i përket grup-moshave, vlen të theksohet se grup-mosha 65-75 vjeç është ajo më e bindura se PS do ta mbyllë deri në fund mandatin e tretë (vetëm 19% thonë se do ketë zgjedhje të parakohshme).

Metodologjia

Sondazhi u bë për Euronews Albania nga kompania prestigjioze MRB, e cila zhvilloi 1,000 intervista (49.5% meshkuj, 50.5% femra) ballë për ballë në zonat urbane dhe rurale me persona me të drejtë vote (mbi 18 vjeç) nga data 25 maj deri më 2 qershor.