Policia gjermane arrestoi bashkëpunëtorin e një deputeti të së djathtës ekstreme, i akuzuar për spiunazh në favor të Kinës.

Personi në fjalë, i identifikuar si Jian G, është zyrtarisht një asistent i Maximilian Krah, anëtar i Parlamentit Evropian dhe kandidati udhëheqës për partinë ekstremiste të djathtë Alternativa për Gjermaninë.

Zyra e prokurorit federal deklaroi se ai akuzohet se është i punësuar i shërbimeve sekrete kineze dhe se i ka kaluar këtyre të fundit rregullisht informacione mbi negociatat dhe vendimet në Parlamentin Evropian.

Arrestimi i Jian G erdhi pak pas vënies në pranga të tre personave të tjerë, po për spiunazh në favor të Kinës.

Tre shtetasit gjermanë akuzohen se kanë kaluar informacione të rëndësishme mbi përdorimin e teknologjisë ushtarake në Gjermani.

Sipas prokurorëve, ata punonin për shërbimet kineze të inteligjencës që prej qershorit 2022 dhe dyshohen gjithashtu për shkelje të ligjeve gjermane të eksportit.

Arrestime të ngjashme u kryen të njëjtën ditë edhe në Mbretërinë e Bashkuar. Agjentët e Scotland Yard vunë në pranga dy persona që i kalonin informacione agjentëve të fshehtë kinezë.

Christopher Berry dhe Christopher Cash, përkatësisht 32 dhe 29 vjeç, sipas hetuesve, i kanë kaluar artikuj, dokumente dhe informacione një shteti të huaj.

Autoritetet deklaruan se arrestimi i tyre kishte ardhur pas një hetimi shumë kompleks.

LEXONI GJITHASHTU:

• “Moska do nis një ofensive të madhe ndaj…”- Raporti i Institutit Amerikan
• Polonia shprehet e gatshme të mirëpres vendosjen e armëve bërthamore të NATO-s
• Zelensky kundër planit të Trump: S’i japim toka Rusisë