Si po tkurret Venecia, qyteti-lagunë pre e ndryshimeve demografike

Turistët në një gondola që rrëshqasin në ujërat e qeta të kanalit. Kjo është pamja ikonë e Venecias, që njihet në mbarë botën, por ajo që nuk dihet është fakti se qendra historike e qytetit ka humbur 125 mijë banorë që prej 1950-s.

Shifrat ranë nën pragun simbolik prej 50 mijë njësish pak muaj më parë. Kjo kryesisht për shkak të rënies demografike të popullsisë italiane, por edhe për shkak të faktorëve të tjerë.

“Në thelb, trendi demografik varet nga 3 faktorë të rëndësishëm: së pari nga trendi i natyrshëm i lindjeve dhe vdekjeve; së dyti nga trendi social, duke llogaritur ata që shkojnë dhe vijnë këtu për të jetuar, që është diçka pozitive për Venecian e që duhet vënë në dukje; dhe së treti një lëvizje e banorëve brenda të njëjtit qark,” – u shpreh Laura Besio, anëtare e Këshillit Bashkiak.

Shoqatat civile janë të shqetësuara se Venecia gradualisht po vdes dhe vazhdimisht përditësojnë ndryshimet sa i takon numrit të banorëve në qendrën historike.

“Turizmi është një thikë me dy presa për ne, sepse na bën të sigurojmë jetesën, por në të njëjtën kohë ai zapton hapësirat e banorëve dhe këtu i referohem shtëpive dhe shërbimeve,” – tha Matteo Secchi nga shoqata Venessia.com.

Për njerëzit që jetojnë këtu, kthimi i shtëpive të tyre në hotele për turistët është më i leverdisshëm se dhënia me qira për një kohë të gjatë atyre që duan të jetojnë në qytet. Bashkia po përpiqet ta frenojë problemin përmes strehimeve sociale, shërbimeve arsimore dhe një transporti më të përballueshëm.

“Është gjithashtu e vërtetë se të dhënat e regjistruara nuk janë shteruese sa i takon numrit të njerëzve që jetojnë çdo ditë në Venecia, pasi ka një kategori të tërë që nuk llogaritet e që nuk kanë rezidencë në qytet,” – deklaroi Besio.

Kjo kategori përbëhet nga studentët dhe ata që punojnë në qytet, por që nuk e kanë rezidencën aty. Ata llogaritet të jenë rreth 10 mijë persona.

“Qyteti përbëhet nga ata që jetojnë këtu 24 orë në ditë. T’i referohesh numrit të atyre që nuk kanë rezidencë dhe udhëtarëve është e kotë, pasi ata nuk jetojnë në qytet 24 orë sikurse ne,” – tregoi Secchi.

Cilado qoftë arsyeja, rreziku i shpopullimit përbën një rrezik konstant për Venecian. Turizmi në masë është burimi kryesor i ekonomisë, por ai rrezikon ta kthejë këtë qytet në një muze në qiell të hapur pa zemrën pulsuese të banorëve të saj.

LEXONI GJITHASHTU:

• Venecia shtyn vendosjen e tarifës për turistët
• Spahiu: PD është kthyer në parti provenciale, PS ka marrë elektoratin e brezit të ri