Si u inskenua zhdukja e biznesmenit italian, dyshohet se kockat në makinë i përkasin një personi të zhvarrosur

Kockat e gjetura në automjetin e djegur në Pukë ku dyshohej se humbi jetën biznesmeni italian, Davide Pecorelli i përkasin një personi rreth 40-50 vjeç. Është kjo përgjigjja e analizimit të mbetjeve kockore të gjetura në makinën tip ‘Skoda’ të shkrumbuar në janar në Pukë.

Në dosjen e plotë hetimore të siguruar nga Euronews Albania, thuhet se këto mbetje janë dërguar jashtë vendit për ekspertim të thelluar dhe pritet identifikimi i tyre.

Sipas burimeve nuk përjashtohet as mundësia që biznesmeni Pecorelli të ketë marrë mbetje kockore nga varri i ndonjë personi të vdekur për të inskenuar zhdukjen e tij. Mbi këto dyshime, prokuroria e Pukës pritet të ngrejë 2 akuza për biznesmenin italian të gjetur pak ditë më parë, pas 8 muajsh, në zonën e Toskanës.

Konkretisht për ‘Shkatërrim të pronës me zjarr’ dhe ‘Dëmtim varresh’. Për të vënë në jetë planin e tij të ‘zhdukjes’ hetuesit kanë dyshime se Pecorelli është ndihmuar edhe nga persona të tjerë jo vetëm për djegien e makinës të marrë me qira, por dhe për daljen nga Shqipëria përmes pikës doganore të ‘Hanit të Hotit’.

E gjithë kjo skemë e ngritur nga biznesmeni italian dyshohet të jetë bërë për të shmangur borxhet dhe me qëllim përfitimin e siguracioneve. Krahas akuzave të ngritura tashmë nga prokuroria e Pukës, Davide Pecorelli rrezikon të procedohet edhe nga autoritetet italiane për falsifikim të dokumenteve identifikuese të cilat i përdorte gjatë kohës që fshihej në Itali.

LEXONI GJITHASHTU:

• Zhdukja e biznesmenit italian, hetuesit arrijnë të zbërthejnë GPS-in
• Gjendet i gjallë biznesmeni italian që dyshohej se ishte djegur brenda automjetit të tij në Pukë