Sigurimi i pronës nga tërmeti, ankohet Shoqata e Siguruesve: Përfshini edhe privatin

Shoqata e Siguruesve të Shqipërisë nuk bie plotësisht dakord me ligjin që detyron qytetarët t’i  sigurojnë banesat nga tërmetet. Ankesat dhe rezervat që ka për të, Shoqata ia ka përcjellë, Minstrisë së Financave në një letër të hapur.

Në parim, Shoqata shprehet në favor të nismës për miratimin e një ligji, por kundërshton modelin që propozohet për këtë lloj sigurimi.

Projektligji i hedhur për konsultim publik nga Ministria e Financave parashikon një skemë tërësisht shtetërore të sigurimit të detyrueshëm nga tërmetet.

Por, sipas siguruesve, një model të tillë nuk e ndjek asnjë prej vendeve të Europës. Edhe në Turqi apo Rumani, të marra si referencë në relacionin shpjegues të projektligjit, skema nuk është tërësisht shtetërore, pasi përfshin shoqëritë private të sigurimeve si palë në shitjen e këtij produkti.

Gjithashtu, sipas siguruesve, skema e sigurimit e propozuar sjell kosto të shtuara dhe të pajustifikuara ndaj qytetarëve.

Ata argumentojnë se shoqëritë e sigurimit që operojnë në treg, kanë ekspertizën, burimet njerëzore dhe infrastrukturën e nevojshme për ofrimin e produkteve të sigurimit. Sipas tyre, krijimi i një enti apo shoqërie të re shtetërore, do të sillte shpenzime të mëdha për ti ngritur nga e para këto kapacitete, shpenzime këto që në fund do ti transferohen qytetarëve.