Siria dënon sulmin izraelit pranë Damaskut

Siria dënoi me forcë ndërhyrjen e huaj në vend pas një sulmi të rrallë izraelit pranë Damaskut të mërkurën, në një kohë tensionesh të rënda sektare dhe dhune vdekjeprurëse.

Sipas autoriteteve siriane, sulmi izraelit vrau të paktën një oficer sigurie dhe plagosi disa persona të tjerë.

Më herët gjatë ditës, ushtria izraelite njoftoi se kishte kryer një operacion në periferi të kryeqytetit sirian, duke thënë se kishte në shënjestër një “grup ekstremist” që kishte sulmuar komunitetin Druze, një pakicë fetare në vend.

Në një deklaratë të përbashkët, kryeministri i Izraelit, Benjamin Netanyahu, dhe ministri i Mbrojtjes, Israel Katz, thanë se sulmi në qytetin Sahnaya, në jugperëndim të Damaskut, ishte një “veprim paralajmërues” ndaj një grupi të armatosur të paidentifikuar “që po përgatitej të vazhdonte sulmet ndaj popullsisë druze”.

Ministria e Jashtme e Sirisë reagoi duke theksuar se qeveria ka një “angazhim të palëkundur” për të mbrojtur të gjithë popullin sirian, përfshirë “komunitetin e nderuar Druze”.

Sipas agjencisë shtetërore siriane SANA, forcat qeveritare nisën një operacion të gjerë në zonën përreth Sahnayas për të arrestuar “grupet e jashtëligjshme” pas një sulmi nga një grup i armatosur të martën vonë, ku u plagosën tre oficerë në një pikë kontrolli.

Grupi i armatosur, sipas raportimeve, hapi zjarr ndaj automjeteve civile dhe të sigurisë në zona të tjera përreth. Dhuna e fundit ka shkaktuar të paktën 11 viktima dhe dhjetëra të plagosur.

Kleriku më i lartë mysliman i Sirisë, Osama al-Rifai, u bëri thirrje qytetarëve të ruajnë qetësinë dhe të shmangin përshkallëzimin e situatës.

“Të gjithë duhet të qëndrojnë larg thirrjeve për hakmarrje dhe të lejojnë drejtësinë të ndjekë rrugën e saj,” tha Rifai në lidhje me ngjarjet në Sahnaya, sipas SANA-s.

Dy gazetarë vendas në Damask, duke folur në kushte anonimiteti për shkak të sigurisë, i thanë CNN-së se përleshjet shpërthyen midis luftëtarëve besnikë ndaj qeverisë siriane dhe milicisë nga pakica druze.

Që prej përshkallëzimit të konfliktit sirian dhe rënies së kontrollit të plotë të regjimit të Bashar al-Assad në disa zona, Izraeli e ka paraqitur veten si një mbrojtës të komunitetit druz në Siri – një grup etnik arab që ndjek një degë të veçantë të Islamit dhe që është i pranishëm në Siri, Liban dhe Izrael.

Një pjesë e vogël e druzëve sirianë kanë mirëpritur propozimet e Izraelit, ndërsa shumë të tjerë i kanë denoncuar ato publikisht.

Një numër i konsiderueshëm druzësh jetojnë brenda kufijve të njohur ndërkombëtarisht të Izraelit, ku posedojnë shtetësi izraelite dhe shërbejnë në ushtrinë izraelite.

Ndërkohë, një komunitet i madh siriano-druze jeton në Lartësitë e Golanit të pushtuara nga Izraeli, shumica e të cilëve e kanë refuzuar shtetësinë izraelite dhe tradicionalisht nuk shërbejnë në ushtrinë izraelite.

Në një deklaratë të mërkurën, gjatë Ditës së Përkujtimit të ushtarëve izraelitë të rënë, autoritetet izraelite theksuan: “Ndërsa nderojmë kontributin e komunitetit druze në sigurinë e Izraelit, theksojmë angazhimin tonë për të mbrojtur vëllezërit e tyre në Siri”.

Izraeli gjithashtu i bëri thirrje qeverisë siriane të mbrojë komunitetin druz nga dhuna.

Më vonë të mërkurën, ushtria izraelite njoftoi se kishte evakuuar tre qytetarë sirianë druzë për trajtim mjekësor në Izrael, pasi kishin mbetur të plagosur gjatë përleshjeve në Siri.

I dërguari i posaçëm i Kombeve të Bashkuara për Sirinë, Geir Pedersen, shprehu “shqetësimin e thellë për dhunën e papranueshme” në Siri dhe për “raportimet alarmuese për sulmet izraelite”.

“Këto sulme duhet të ndalen,” tha Pedersen, duke kërkuar “respekt të plotë për sovranitetin e Sirisë”.

Situata në terren mbetet e paqëndrueshme. Banorë lokalë i thanë CNN-së se Sahnaya vazhdon të përjetojë përleshje sporadike dhe sulme të herëpashershme nga grupe të armatosura të paidentifikuara, që përfshijnë zjarr mortajash dhe armë të kalibrit të mesëm.

Sipas tyre, përpjekjet për ndërmjetësim nga zyrtarë qeveritarë dhe udhëheqës të komunitetit janë ende në vazhdim.

LEXONI GJITHASHTU:

• Ushtria izraelite do qëndrojë për një kohë të pacaktuar në Gaza, Liban dhe Siri
• Erdogan kritikon Izraelin për minimin e stabilitetit në Siri