Ushtria izraelite do qëndrojë për një kohë të pacaktuar në Gaza, Liban dhe Siri

Ushtria izraelite do të qëndrojë për një kohë të pacaktuar në të ashtuquajturat zona të sigurisë që ka krijuar në Rripin e Gazës, Liban dhe Siri, tha të mërkurën ministri i mbrojtjes.

“Ndryshe nga e kaluara, ushtria izraelite nuk po evakuon zonat që janë pastruar dhe kapur”, tha ministri i Mbrojtjes, Israel Katz.  

Vendimi mund të komplikojë më tej bisedimet me Hamasin për një armëpushim në enklavën palestineze dhe lirimin e pengjeve të mbetura.  Forcat izraelite janë të pranishme në më shumë se gjysmën e Gazës në një fushatë të rinovuar pas rënies muajin e kaluar të armëpushimit me grupin militant. 

Ajo gjithashtu ka refuzuar të tërhiqet nga disa zona në Liban pas një armëpushimi me grupin militant Hezbollah vitin e kaluar.  Në Siri, Izraeli pushtoi një zonë tampon në jug të vendit pasi rebelët përmbysën presidentin Bashar al-Assad në dhjetor. 

Palestinezët, Libani dhe Siria të gjithë e shohin praninë e trupave izraelite si një okupim ushtarak në kundërshtim me ligjin ndërkombëtar.

Hamasi ka thënë se nuk do të lirojë dhjetëra pengjet e mbetura pa një tërheqje të plotë të Izraelit nga Gaza dhe një armëpushim të qëndrueshëm. Në një deklaratë, organizata kryesore që përfaqëson familjet e robërve tha se pavarësisht premtimit se pengjet do të vinin të parët, Izraeli në fakt po zgjidhte territorin para gjithçkaje. 

“Ka një zgjidhje që është e dëshirueshme dhe e realizueshme, dhe ajo është lirimi i të gjithë pengjeve menjëherë si pjesë e një marrëveshjeje, madje edhe me koston e përfundimit të luftës,” tha ai. 

Izraeli thotë se duhet të mbajë kontrollin e atyre që i referohet si zona sigurie për të parandaluar një përsëritje të sulmit të Hamasit të 7 tetorit 2023 në Izraelin jugor, duke vrarë rreth 1200 njerëz, kryesisht civilë dhe duke rrëmbyer 251 të tjerë. 

LEXONI GJITHASHTU:

• 10 britanikë akuzohen për krime lufte, shërbyen me ushtrinë izraelite në Gaza
• Të paktën 32 të vdekur nga sulmet izraelite në Gaza, mes tyre gra dhe fëmijë