Sitet arkeologjike të Vlorës, Porto Palermo dhe Oriku në krye të destinacioneve

Ky sezon veror ka rezultuar tepër i suksesshëm për sitet arkeologjike në qarkun e Vlorës.

Sipas Orgest Feimit, drejtues i Drejtorisë Rajonale të Trashëgimisë Kulturore në Vlorë, që menaxhon të gjitha sitet arkeologjike në rang qarku, numri i vizitorëve është rritur me 42% krahasuar me të njëjtën periudhë të një viti më parë.

“Nga 1 janari deri më 31 gusht 2025, kemi regjistruar 13,212 vizitorë më shumë se në të njëjtën periudhë të vitit të kaluar. I njëjti trend rritjeje po vijon edhe në ditët e para të shtatorit dhe kemi besim që kjo do të zgjasë deri më 31 tetor, kur mbyllet sezoni turistik kulturor i shpallur nga ministria. Edhe pas këtij afati, pritshmëritë janë të larta që sitet dhe monumentet e kulturës do të vazhdojnë të frekuentohen nga vizitorët,” – u shpreh Feimi.

Porto Palermo kryeson listën e vendeve më të vizituara, e ndjekur nga kalatë e Himarës dhe Kaninës, si dhe parqet arkeologjike të Orikut dhe Amantias.

“Si çdo vit, në krye qëndron Kalaja e Porto Palermos me numrin më të lartë të vizitorëve, pasuar nga kalaja e Himarës dhe ajo e Kaninës. Kalaja e Kaninës është aktualisht në proces restaurimi të plotë dhe prej muajit mars nuk është e aksesueshme për vizitorët – procesi do të zgjasë rreth një vit. Po ashtu, një interes i veçantë vihet re edhe për parqet arkeologjike të Orikut dhe Amantias,” – shpjegon Feimi.

Turistët që vizitojnë sitet arkeologjike të Vlorës vijnë nga një sërë vendesh të botës.

“Kryesisht kemi vizitorë nga Gjermania, Franca, Spanja, Holanda dhe Italia, por edhe nga Azia, Australia dhe Amerika. Rreth 75% e vizitorëve janë të huaj, krahasuar me 25% vendas.”

Rritja e numrit të turistëve ka ndikuar drejtpërdrejt edhe në të ardhurat e Drejtorisë së Trashëgimisë Kulturore në Vlorë, të cilat do të përdoren për investime të mëtejshme në monumente dhe mirëmbajtje.

“Të ardhurat janë rritur me 50 deri në 60% krahasuar me një vit më parë. Ligji përcakton që 90% e të ardhurave të mbledhura kalojnë për institucionin që i gjeneron, çka përkthehet në më shumë investime dhe punë mirëmbajtëse për këto monumente,” – thekson drejtori.

Vlora nuk ofron vetëm det, klimë dhe plazh. Çdo ditë, qindra turistë të huaj, përveçse shijojnë bukuritë natyrore të zonës, zgjedhin të vizitojnë edhe dhjetëra vende me vlerë të lartë historike e arkeologjike, të shpërndara në të gjithë qarkun.

LEXONI GJITHASHTU:

• “Nuk e prisja kaq bukur”, Shkodra magjeps vizitorët nga e gjithë bota
• Transformohet zona e makinave të braktisura, Rama: Shkodra do të ketë një park të ri