Situata e motit të keq, Ministria e Mbrojtjes informacion mbi zonat problematike

Ministria e Mbrojtjes dhe Agjencia Kombëtare e Mbrojtjes Civile, kanë ndarë përmes një komunikate zyrtare informacione në lidhje me situatën e motit në vend.

Në komunikatë renditen disa nga zonat më problematike dhe veprimet e ndërmarra për normalizimin e situatës.

Ministria e Mbrojtjes bën me dije se të gjitha strukturat shtetërore ndodhen në terren dhe po punojnë për zgjidhjen e problematikave.

“Në Lezhë, në aksin rrugor Skuraj-Burrel, ka ndodhur renie masive e gurëve dhe bllokim i rrugës. Aktualisht, rrugët janë pastruar dhe qarkullimi është rikthyer në normalitet në fshatin Shkopet.

Në Mirditë, uji nga perroi Zmeja ka dalë nga shtrati në disa vende, shkaktuar prezencë të ujit në oborrat e disa banesave. Aktualisht, niveli i ujit është stabilizuar pas ndërhyrjes së strukturave lokale të emergjencave civile.

Në Vlorë, ka pasur prezencë të ujit dhe inertesh në disa zona të vogla, por situata është në përmirësim dhe strukturat lokale të mbrojtjes civile po punojnë për normalizimin e plotë.

Në disa qytete të tjera si Kurbin, Kukës, Tropojë, Shkodër, Durrës dhe Sukth, janë raportuar disa vështirësi, por të gjitha strukturat e Mbrojtjes Civile janë në gatishmëri të plotë për të ndihmuar qytetarët.

Agjencia Kombëtare e Mbrojtjes Civile, nëpërmjet Qendrës Kombëtare të Emergjencave Civile dhe strukturave të Mbrojtjes Civile në Prefektura dhe Bashki, ndjek në kohë reale situatën duke koordinuar dhe bashkërenduar strukturat operacionale të pushtetit vendor dhe qendror për menaxhimin e çdo emergjence të krijuar”, njofton Afgjencia e Mbrojtjes Civile.