Situata e përmbytjeve në vend, ministri i Mbrojtjes: Fierza po punon me porta të mbyllura, po menaxhohet mirë

Ulja e reshjeve të shiut gjatë natës ka sjellë një përmirësim të situatës nga përmbytjet. Niveli i Lumit Vjosë ka shënuar rënie në Urën e Mifolit, por situata mbetet problematike në zonën e Memaliajt.

Problematike situata vijon të mbetet në veri të vendit kryesisht në zonën e nënshkodrës për shkak se kjo zonë ndodhet nën nivelin e detit.

Në Lezhë në njësinë administrative të Ugrejit është shembur rruga e fshatit Kreshtë.

 Për të parë nga afër situatën në këto zona ishte i pranishëm ministri i Mbrojtjes së bashku me drejtorin e Agjencisë së mbrojtjes Civile.

Sipas Peleshit, pas qetësimit të situatës këtë të shtunë, dita e nesërme dhe fillimi i javës tjetër do të sjellin reshje të shumta dhe pritet që situata të përkeqësohet. Ndërkaq gjendja në kaskadën e Drinit nuk paraqet problem.

 “Po menaxhohet mirë kaskada. Fierza po punon me porta të mbyllura dhe ka 10 metra rezervë për t’u mbushur. Nuk besoj se do të arrijmë në pika kritike deri në datën 11 kur  do të jetë intensiteti maksimal i reshjeve. Edhe në Vaun e Dejës ka shkarkime normale”, tha ministri Peleshi.

Sipas Peleshit rreth 1500 efektivë të forcave të armatosura janë në terren për të përballuar çdo situatë të mundshme.