Izraeli ka pranuar të lejojë shpërndarjen e ndihmave në Gaza pas një telefonate Biden-Netanyahu. Shteti hebre do të lejojë ofrimin e përkohshëm të ndihmave përmes portit të Ashdodit dhe kalimit të Erezit.

Biden paralajmëroi Netanyahun se politika e SHBA ndaj Izraelit mund të ndryshojë nëse vendi nuk merr hapa konkretë për zgjidhjen e krizës humanitare.

“Presidenti theksoi se sulmet ndaj punonjësve humanitarë dhe situata e përgjithshme humanitare në Gaza janë të papranueshme. Ai e bëri të qartë nevojën që Izraeli të njoftojë dhe implementojë një seri masah për të mbrojtur civilët, shpërndarjen e ndihmave dhe sigurinë e punonjësve. Ai bëri gjithashtu të qartë se politika e SHBA ndaj Gazës do të përcaktohet në bazë të shqyrtimit të hapave dhe veprimeve të Izraelit”, deklaroi John Kirby, zëdhënës i Këshillit të Sigurisë Kombëtare të SHBA.

Ndërkohë, vazhdojnë homazhet në nder të 7 punonjësve humanitarë të vrarë nga sulmi izraelit ditën e hënë. Dhjetëra njerëz u mblodhën në një qytet në jug-lindje të Polonisë për të nderuar Damien Sobol.

Krahas bombave, uria po vret gjithashtu palestinezët. Izraeli është zotuar se do të lejojë kalimin e ndihmave nga Jordania, që hyjnë përmes kalimit jugor Kerem Shalom.

Vetë Jordania po shpërndan ndihma nga ajri. Të enjten forcat e armatosura të vendit kryen 10 misione humanitare.

LEXONI GJITHASHTU: 

• Biden i prerë me Netanyahun: Mbështetja amerikane për luftën varet nga masat e reja
• Biden: Mbështetja e SHBA-së për Izraelin varet nga mbrojtja e civilëve