Skandali i mikrokredive, guvernatori i BSH thirret për seancë dëgjimore në Kuvend

Deputetët e grupit parlamentar të Partisë Demokratike kërkojnë thirrjen në një seancë dëgjimore të Guvernatorit të Bankës së Shqipërisë, Gent Sejko lidhur me problemin e kredive të administruara nga Micro Credit Albania sh.a.

Në kërkesën drejtuar kreut të komisionit të Ekonomisë Eduard Shalsi thuhet se 100 mijë persona dyshohet të jenë prekur nga një skemë e gjerë mashtrimi që në qendër ka shoqërinë Micro Credit Albania sh.a, e licencuar nga Banka e Shqipërisë për kryerjen e veprimtarive financiare jobankare të kredidhënies dhe mbledhjes së borxheve të këqija.

“Megjithëse blerja e kredive të këqija dhe ekzekutimi i tyre në mënyrë të rregullt, nuk është një veprimtari e paligjshme, praktikat që ndiqte shoqëria “MCA” për ekzekutimin e këtyre kredive ishin tërësisht të paligjshme dhe me pasoja shumë të rënda për qytetarët.” Thuhet mes të tjerash në kërkesën e deputetëve të PD.

Seanca dëgjimore është caktuar ditën e martë, datë 21.5.2024, ora 11:00.