Skandali me diplomat false, reagon Bordi i Akreditimit të Arsimit të Lartë

Bordi i Akreditimit të Institucioneve të Arsimit të Lartë ka reaguar lidhur me dosjen e falsifikimit të diplomave nga kolegji universitar Wisdom, ku nga hetimet e Guardia di Finanza është implikuar edhe kryetarja e Bordit të Akreditimit të Cilësisë në Arsimin e Lartë, Shqiponja Telhaj.

Lidhur me këtë çështje ka reaguar Bordi i Akreditimit të Cilësisë në Arsimin e Lartë, duke mohuar përfshirjen e Telhaj në këtë aferë.

“Së pari, Prof. Shqiponja Telhaj nuk ka ushtruar në asnjë moment detyrën e presidentes së Agjencisë së Sigurimit të Cilësisë në Arsimin e Lartë (ASCAL), por ushtron nga korriku 2021 detyrën e Kryetares së Bordit të Akreditimit. Përgjimet i referohen “Presidente della ASCAL”, ndërsa në komentet e dosjes është vënë gabimisht emri (i përkthyer) i kryetares së bordit si drejtuese e institucionit të ASCAL. Sqarojmë se në bazë të nenit 15 të Ligjit për Arsimin e Lartë, Bordi i Akreditimit është organ kolegjial vendimmarrës dhe i pavarur në veprimtarinë e tij, i ngritur pranë ASCAL. ASCAL drejtohet nga një Drejtor, ndërsa Bordi i Akreditimit nga Kryetari i Bordit të Akreditimit. Prof. Shqiponja Telhaj ka mbajtur dhe mban vetëm detyrën e Kryetares së Bordit të Akreditimit. Së dyti, kryetarja e Bordit të Akreditimit, Prof. Telhaj jeton dhe zhvillon aktivitetin e saj akademik në Mbretërinë e Bashkuar, dhe deklaron se ka qenë ne Mbretërinë e Bashkuar edhe në ditën kur është zhvilluar darka e pretenduar. Këto fakte janë lehtësisht të verifikueshme nëpërmjet sistemit TIMS. Ndërkohë që Prof. Telhaj do ta ndjekë çështjen edhe ligjërisht për të kërkuar tërheqje dhe kërkim falje për akuzat e rreme, anëtaret e bordit dëshirojnë të ritheksojnë besimin e tyre të plotë në integritetin e saj në drejtimin e bordit. Së treti, Bordi i Akreditimit i drejtuar nga Prof. Telhaj deri më sot nuk ka marrë asnjë vendim për akreditimin institucional të institucionit në fjalë. Së katërti, e gjithë vendimmarrja e Bordit lidhur me akreditimet mbështetet në raportet e hartuara nga ekspertët që përcaktohen nga ASCAL dhe dokumentacionet e dorëzuara nga institucionet”, sqaron Bordi i Akreditimit.

LEXONI GJITHASHTU:

• Skandali i “Wisdom”, si printoheshin diploma false dhe shiteshin për 20 mijë euro
• Prokuroria e Tiranës nis hetimet në lidhje me skandalin e shitjes së diplomave