Skënderbeu fiton finalen e parë në volejbollin për femra

Skënderbeu nuk ka zhgënjyer ndaj Tiranës në finalen e parë të volejbollit për vajza, duke e mposhtur në shtëpi në shifrat 3-0. Një përballje që u prit me interes nga tifozëria korcare, që në fund iu gëzua fitores, duke e parë veten më pranë fitimin të titullit. Rivaliteti në parket ishte i madh në të treja setet, që u fituan nga të besuarat e Orlando Kojës në shifrat 25-23, 25-20 dhe 26-24.

Në përfundim të dy teknikët si Koja ashtu dhe Bülent Karslıoğlu analizuan sfidën.

 “Një ndeshje e fituar, fillim i mbarë, play off është e rëndësishme ta fillosh gjithmonë me fitore, shfrytëzuam faktorin fushë, u realizua me 3-0. Mendoj që këto ndeshje janë vazhdim i njëra tjetrës, skuadrat njihen shumë mirë tani, mund të bëhen disa ndryshime të vogla taktike por shkohet në Tiranë për betejën e radhës për fitoren e radhës”,- Orlando Koja-Trajner i Skënderbeut.

“Ndeshja përgjithësisht pati gabime në disa fragmente të lojës. Është e kuptueshme sepse janë finalet dhe ngarkesa psikologjike është e madhe. Ajo çka do të ndodhë në Tiranë do të jetë një histori krejt ndryshe nga ajo që pate në Korçë. Ndikon dhe faktori fushë. Por ndeshja në Tiranë i përket Tiranës”,- Bülent Karslıoğlu-Trajner i Tiranës.

Kapitenja Elena Bego kërkon që skuadra të përmirësohet edhe më tepër, për të fituar më tej titullin, ndërsa dy lojtarët e tjera Perce e Williams besojnë se titulli kampion shkon në Korçë.

“Në qoftë se rregullojmë ato gabimet që bëmë sot që na ndikuan në lojë, mendoj se në Tiranë do jetë më e thjeshtë”,- Elena Bego,Volejbolliste e Skënderbeut.

 “Jam shumë e lumtur që sot fituam. Kërkoj shumë ndjesë tifozëve dhe ekipit sepse sot isha e sëmurë dhe nuk munda të jepja 100% nga vetja. Titulli do të vijë në Korçë. Kjo nuk diskutohet. Ne do të jemi kampionët”,- Fabiana Perce, volejbolliste e Skënderbeut

“Sot kërkuam t’i tregojme Tiranës se nuk ka asnjë ekip që mund të fitojë në fushën e Korçës. Dhe këtë bëmë. Titulli na përket ne. Sot patëm disa gabime të vogla por jam e bindur që këtë vit titulli vjen në Korçë”,-tha Kayla Williams, volejbolliste e Skënderbeut.

Finalja e dytë mes këtyre dy skuadrave është ajo e 24 prillit në kryeqytet.

LEXONI GJITHASHTU:

• Vinin baste sportive në celularë, vihen në pranga 3 persona
• “Serbia përshkallëzoi dhunën”, Osmani përballë Vuçiç: Sollën mjete luftarake në kufi