“S’më thanë gjë, thjesht më rrahën”, flet punonjësi i pastrimit që u dhunua në Vlorë

Një ngjarje e dhunshme ka ndodhur në qytetin e Vlorës, ku një 61-vjeçar, punonjës i Ndërmarrjes së Pastrimit, është goditur brutalisht nga dy të rinj.

Ngjarja ka ndodhur pranë postës së Çoles, teksa i moshuari ishte duke ushtruar detyrën me mjetin e tij të punës.

Sipas dëshmisë së viktimës, dy të rinj janë afruar me një furgon, kanë zbritur dhe pa asnjë paralajmërim kanë nisur ta godasin në trup dhe në kokë, duke i shkaktuar dëmtime të shumta, përfshirë plagë në kokë dhe syrin e djathtë.

“Isha te posta e Çoles. Më vjen një furgon dhe më ndalon, më zë rrugën dhe zbresin të dy poshtë. Ishin dy djem të rinj, me ngjyrë, nga 25-30 vjeç. Filluan të më godasin, më hynë këmbës dhe dorës. Mbas me lanë me gjak, tentuan të hipnin në furgon. Unë u zura rrugën me mjetin e punës që të mos iknin, sa të vinte policia. Ata zbritën përsëri dhe më rrahën prapë. I hipën furgonit dhe ikën. S’e di pse lindi konflikti, s’e imagjinoj dot. S’kam pas konflikt as ndonjë gjë me ta. Ata veçse zbritën dhe më goditën. As më pyetën, as më thanë asgjë, as haber. Vetëm në fund më thanë: ‘E shko në polici po deshe. Më erdhi dikush i afërt i tyre në spital dhe më tha që i kam dorëzuar vetë në polici. Sa e vërtetë është, s’e di. Kam thyerje këtu, do bëjmë konsultat dhe raportin mjeko-ligjor. Ma morën dëshminë”, – është shprehur 61-vjeçari për mediat.

Burime të pa konfirmuara dyshojnë se konflikti ka nisur pasi punonjësi i pastrimit mund të ketë prekur furgonin e tyre me mjetin e punës.

Sipas Policisë së Vlorës, falë hetimeve të shpejta dhe kqyrjes së kamerave të sigurisë, janë identifikuar dhe arrestuar autorët e ngjarjes:

1. S., 37 vjeç, banues në Vlorë, me precedent penal për “Plagosje të rëndë me dashje”, kryer me armë zjarri;
2. N., 30 vjeç, banues në Vlorë, i dënuar më parë për “Prodhim dhe shitje të narkotikëve”.

Policia ka nisur hetimet për zbardhjen e plotë të rrethanave të ngjarjes.

LEXONI GJITHASHTU:

• Dhunuan punonjësin e pastrimit në Vlorë, arrestohen dy persona me precedent penal
• Prezantohet kandidatura e Brunilda Mersinit para strukturave të PS-së në Vlorë