“S’mi lidhni dot duart”- U vra nga Policia serbe, mesazhi i fundit i Faton Hajrizit

Ditën e sotme u raportua se u vra shqiptari Faton Hajrizi, i dyshuar për vrasjen e një polici në Serbi dhe plagosjen e një tjetri.

Ndërkohë është zbuluar edhe mesazhi i fundit i Hajrizit par se të ekzekutohej, i cili shprehej se nuk do të dorëzohej para forcave serbe, veçse i vdekur.

“Nuk e lejoj unë me mi lidhë duart. Mund të më çoni maksimumi deri në morg. Nuk përtoj me vdek unë. Edhe katunarët e mi më varrosin me nderime”, ka thënë Hajrizi në një audio.

Ka qenë zëvendëskryeministri i Serbisë, njëherësh ministër i Punëve të Brendshme, Ivica Daçiç, i cili ka thënë se është vrarë personi që në orët e para të së enjtes vrau një polic në Serbi.

Identiteti i personit të vrarë nuk është përmendur në komunikatën e lëshuar nga autoritetet serbe pasditen e 19 korrikut.

Daçiç më herët gjatë së premtes tha se autoritetet ishin në kërkim të Faton Hajrizit, i dyshuar për vrasjen e policit dhe plagosjen e një tjetri në Lloznicë, qytet në pjesën perëndimore të Serbisë.

Ministria e Brendshme e Serbisë po ashtu publikoi fotografinë e Hajrizit dhe u bëri thirrje qytetarëve për bashkëpunim.

Autoritetet kryen kontrollet në dy anët e lumit Drina, që gjendet në kufi me Serbinë dhe Bosnje-Hercegovinës, pasi dyshonin se personi që kreu vrasjen mund të ishte nisur në atë drejtim, raportoi Radio Televizioni i Serbisë (RTS) më 19 korrik.

Sipas ndihmësdrejtorit të policisë Dragan Vasileviç, helikopterët dhe dronët u përfshin në kërkim.

Sulmi ka ndodhur në orët e para të së enjtes kur policia e ka ndaluar makinën në të cilën ka qenë i dyshuari, për një kontroll rutinor.