“Sondazhet pro Trump”-Hajdari: Fiton në 6 shtete përcaktuese, dënimi i tij, historik

Ish-deputetja e Partisë Demokratike, Rudina Hajdari, është shprehur se sondazhet në SHBA janë në favor të ish-presidentit Donald Trump.

Komentet Hajdari i bëri në emisionin “Review” në Euronews Albania, ku tha se Presidenti aktual i SHBA-ve, Joe Biden, është shumë dobët në sondazhe.

Ajo tha gjithashtu se klima politike në SHBA është shumë e polarizuar dhe sipas saj, amerikanët do të votojnë për të keqen më të vogël dhe jo për kandidatin e preferuar.

“Kjo është një gjë e pazakontë në historinë e SHBA që një kandidat për President të bëhet fajtor para sistemit të Drejtësisë. Është një rast atipik nga këndvështrimi i një kandidati për President. Por nga këndvështrimi i një kandidati si Trump nuk është kaq surprizuese, sepse ai është shumë unik në mënyrën si ka fituar mbështetjen në Amerikë.

Në këtë rast përballë një kandidature tjetër si Biden që është i dobët në këndvështrimin amerikan, duket se në 2024 amerikanët do rendin në fletat e votimit për të bërë një lloj referendumi se kush do të jetë kandidati më pak i keq sesa më i preferuari i Amerikës. SHBA ndodhet në një situatë të vështirë ku flitet për inflacionin, luftërat me jashtë, aleancat në nivel global, etj.

Në situatën që jemi sot, ku amerikanët janë të lidhur pasi Trump ka ecur para me atë sloganin ‘Ta bëjmë Amerikën të madhe sërish’, kjo ka fituar shumë mbështetje. Në 6 vendet që përcaktojnë zgjedhjet e 2024, që në 2020 Biden i ka fituar, të gjitha këto vende janë pro-Trump. Ndjesia është se Trump është duke fituar sipas sondazheve. Republikanët mundohen të shfaqin se ky gjyq është një gjyq politik. Polarizimi politik është shumë i madh”, tha Hajdari.

LEXONI GJITHASHTU:

• Gjykata e shpalli fajtor, Trump shënon rekord donacionesh për fushatë
• Çfarë pritet të ndodhë pas dënimit të Donald Trump