Sot tërhiqen edhe 25% e policëve nga ndërtesat e komunave në veri të Kosovës

Më 10 korrik në Bratisllavë, kryenegociatori i Kosovës, Besnik Bislimi dhe i dërguari i posaçëm për dialogun Kosovë-Serbi Miroslav Lajçak, u dakorduan për hapat që do merren për t’u ulur tensionet në veri të Kosovës

Hapi i parë dhe i dytë kanë të bëjnë me reduktimin e policisë në dhe rreth ndërtesave komunale.

Policia e Kosovës me anë të një njoftimi bëri të ditur se situata në dhe rreth objekteve të komunave veriore vlerësohet e mirë dhe në bazë të kësaj nga sot, mund të nis zvogëlimi i pjesëtarëve policorë edhe për 25%.

“Policia e Kosovës në vazhdën e realizmit të detyrave dhe autorizimeve të saja kushtetuese dhe ligjore në interes të sigurisë publike në vend, si dhe me qëllim të zbatimit të dakordimeve të arritura në Bratisllavë me 10 korrik 2023, në mes të Bashkimit Evropian dhe Republikës së Kosovës, saktësisht hapit dy të këtij dakordimi, me këtë rast është mbajtur takimi punues mes Policisë së Kosovës, EULEX dhe KFOR për vlerësim të situatës së sigurisë, në dhe përreth ndërtesave komunale të komunave veriore. Sipas vlerësimit të përbashkët, nga Policia e Kosovës, EULEX dhe KFOR, situata e sigurisë në dhe rreth objekteve të komunave veriore vlerësohet se është e mirë.”, është bërë e ditur në komunikatën e policisë.

Emisari i Bashkimit Evropian për dialogun Kosovë-Serbi, Mirosllav Lajçak, e ka mirëpritur vendimin për zvogëlimin e pjesëtarëve të Policisë së Kosovës për 25%, në dhe përreth objekteve komunale në veri të Kosovës.

Lajçak ka shkruar në Twitter se ky është një hap i rëndësishëm drejt deeskalimit të plotë të tensioneve në veri të Kosovës.

“E mirëpres vlerësimin e parë të përbashkët të sigurisë ndërmjet Policisë së Kosovës, EULEX-it në Kosovë dhe KFOR-it siç është rënë dakord në Bratislavë. Ky është një hap i rëndësishëm drejt deeskalimit të plotë të tensioneve në veri të Kosovës”, ka shkruar Lajçak në Twitter.

LEXONI GJITHASHTU:

• Artion Vreto: Varka, më e rrezikshme se motori i ujit
• Stuhia kërcënon sërish Slloveninë: Mbrojtja civile dhe ushtria në gatishmëri