SpaceX hyn fuqishëm në AI, blen Anysphere për 60 miliardë dollarë

SpaceX po thellon hyrjen në fushën e inteligjencës artificiale me marrëveshjen e saj më të madhe deri më tani, duke arritur një blerje prej 60 miliardë dollarësh (51.7 miliardë euro) për Anysphere, zhvilluesin e asistentit të kodimit me AI, Cursor.

Marrëveshja, e njoftuar të martën, synon të forcojë pozicionin e SpaceX në tregun e inteligjencës artificiale për ndërmarrjet, ku kompani si OpenAI dhe Anthropic kanë fituar terren të hershëm komercial.

Anysphere, një startup me bazë në San Francisko, përdor inteligjencën artificiale për të automatizuar pjesë të mëdha të procesit të zhvillimit të softuerëve, ndërsa mjeti i tij Cursor përdoret gjerësisht nga programuesit.

Sipas një dokumenti të paraqitur në një autoritet rregullator, marrëveshja parashikon që një degë e SpaceX, X67 Inc., të bashkohet me Anysphere, duke e bërë Cursor një degë tërësisht në pronësi të kompanisë. Bashkimi pritet të finalizohet në tremujorin e tretë të vitit, në varësi të miratimeve rregullatore.

Marrëveshja vjen vetëm një javë pas listimit të suksesshëm të SpaceX në bursë dhe shënon një zgjerim të rëndësishëm të kompanisë përtej industrisë së raketave dhe satelitëve, drejt softuerit dhe inteligjencës artificiale.

Anysphere është themeluar në vitin 2022 dhe ka njohur rritje të shpejtë, duke raportuar rreth 2.6 miliardë dollarë të ardhura vjetore në segmentin biznes-me-biznes, sipas të dhënave të kompanisë.

Startup-i ka siguruar më herët mbi 3 miliardë dollarë financime nga investitorë si Nvidia dhe OpenAI.

Sipas raportimeve, SpaceX ishte përfshirë më herët edhe në një marrëveshje opsionale për blerjen ose partneritetin me Anysphere, ndërsa kjo lëvizje e re shihet si një hap strategjik për të forcuar ekosistemin e saj në inteligjencën artificiale, përfshirë bashkëpunimet me kompaninë xAI të Elon Musk.