SPAK mbyll hetimet për dosjen që godet kokat e krimit, 4.5 mln euro të sekuestruara

Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka nisur komunikimin e akuzave për anëtarët e shtatë grupeve kriminale që u goditën në kuadër të operacionit “Revanshi”. Pas kësaj procedure, SPAK pritet t’i drejtohet drejt Gjykatës për çeljen e gjykimit ndaj të akuzuarve.

Pjesë e këtyre grupeve, që vepronin në qytete të ndryshme si Lezhë, Durrës, Krujë, Tiranë, Vlorë dhe Burrel, janë edhe persona të njohur, si drejtori i Policisë së Lezhës, Henerigert Mitri, dhe individë të lidhur me politikën, përfshirë ish-deputetin Arben Ndoka dhe vëllanë e deputetit Eduard Ndreca, Armando Ndreca. Këto grupe janë akuzuar për aktivitete kriminale të ndryshme, përfshirë vrasje, trafik droge dhe korrupsion.

Në kuadër të operacionit, janë arrestuar 20 persona, 14 prej të cilëve brenda territorit të Shqipërisë dhe 6 jashtë saj, përkatësisht në Itali, Gjermani, Spanjë dhe Belgjikë. SPAK bëri të ditur se operacioni ka goditur grupin kriminal të Ervis Martinajt, i cili, në aleancë me grupin e drejtuar nga ish-deputeti i PS-së, Arben Noka, dhe me ndihmën e grupit të Avdylajt në Durrës, rekrutonin vrasës me pagesë, të cilët kryenin veprime kriminale kryesisht në zonën e Fushë-Krujës dhe Burrelit.

Një tjetër element i rëndësishëm është edhe roli i Drejtorit të Drejtorisë Vendore të Policisë Lezhë, Henerigert Mitri, i cili akuzohet për organizimin e lojrave të fatit dhe mbështetje të biznesmenit të arrestuar, Pëllumb Gjoka, si dhe bashkëpunim me Klodjan Shahinin, shefi i Seksionit të Trafiqeve të Paligjshme dhe Narkotikëve, i cili drejtonte kultivimin e kanabisit.

Gjithashtu, SPAK ka sekuestruar pasuri me vlerë mbi 4.5 milion euro, përfshirë para cash, ora të shtrenjta, makinat të blinduara dhe florinj. Autoritetet pohojnë se janë zbardhur 8 vrasje dhe tentativa për vrasje, duke përfshirë ngjarje të rëndësishme, si vrasja e Shkëlzen Kastratit dhe tentativa për vrasjen e Preng Gjinit, Durim Bamit, Enrik Metra dhe të tjerë.

Aktiviteti kriminal i grupeve të përfshira ka përfshirë gjithashtu kultivimin dhe trafikimin e narkotikëve, ndihmën për kalimin e paligjshëm të kufijve, pastrimin e parave dhe korrupsionin.

LEXONI GJITHASHTU:

• “Për Durin, 1 mln €”-Bisedat për vrasjen e Bamit, Ndoka-Martinajt: Grup nga Kosova
• Ish-mik i Durim Bamit| Kush është Gentjan Bejtja, objektiv i atentatit në Krujë
• Nga Doqja te vëllezërit Bami e klani Duka, zbardhen urdhër-arrestet e SPAK