Spanja shpall tre ditë zie kombëtare pas aksidentit hekurudhor me 39 viktima

Spanja është tronditur nga një aksident i rëndë hekurudhor, ku të paktën 39 persona humbën jetën pas përplasjes së dy trenave me shpejtësi të lartë. Kryeministri spanjoll, Pedro Sánchez, u zotua se një hetim i plotë do të zbulojë shkaqet e aksidentit, ndërsa autoritetet shpallën tre ditë zie kombëtare.

Ngjarja e rëndë ndodhi të dielën në zonën e Adamuzit, kur një tren që udhëtonte drejt Madridit doli nga shinat, kaloi në binarët e kundërt dhe u përplas ballë për ballë me një tren tjetër që po vinte nga drejtimi i kundërt. Sipas dëshmive, përplasja ishte e fuqishme dhe shkaktoi dëme të mëdha materiale.

Një pasagjer i trenit u shpreh për mediat lokale se ndjeu një tronditje të fortë, duke shtuar se kishte “ndjesinë sikur i gjithë treni do të shpërbëhej”. Autoritetet konfirmuan se shumica e viktimave dhe të plagosurve ndodheshin në vagonët e parë të trenit të dytë, i cili po udhëtonte nga Madridi drejt Huelvës.

Ministri i Transportit, Óscar Puente, deklaroi se aksidenti ndodhi në një segment të drejtë të binarëve, duke e cilësuar situatën si “jashtëzakonisht të çuditshme”. Ndërkohë, kompania hekurudhore Iryo bëri të ditur se treni që udhëtonte nga Madridi ishte relativisht i ri, i ndërtuar në vitin 2022, dhe ishte inspektuar vetëm katër ditë para aksidentit.

Hetimet për zbardhjen e plotë të shkaqeve të tragjedisë vijojnë, ndërsa vendi mban zi për viktimat e një prej aksidenteve më të rënda hekurudhore të viteve të fundit.