Specialisti i bankës: Si i kanë vjedhur hacker-at të ardhurat e klientëve nëpërmjet kartave të kreditit

Hackers-at kanë më shumë në fokus sistemet bankare dhe ata gjurmojnë llogaritë e bizneseve ku ka gjenerim më të madh lekësh, por edhe të individëve të ndryshëm. Më vulnerabël duket të jenë bizneset e vogla.

Edhe për shkak të kostove që ka një rrjet i mirë sigurie, ata nuk investojnë në këtë drejtim. Dritan Gucaj, specialist i një banke të nivelit të dytë tregon për dokumentarin Unpublished si vjedhin hackers-at llogaritë bankare.

“Tentativa sigurisht që ka pasur. Përsa iu përket sulmeve, shumica e tyre nuk ndodhin në institucione bankare, pasi kanë marrë masa dhe kanë teknologji për t’u mbrojtur. Shumica e sulmeve ndodhin drejtpërdrejt tek klienti. Nëse do ta marrim sistemin si një zinxhir, hallka më e dobët e tij është klienti, është përdoruesi, i cili nuk tregon kujdes përsa i përket marrjes së informacionit nga internet”,-shpjegon specialisti i bankës së nivelit të dytë.

Hackers-at kanë disa mënyra për të mashtruar klientë dhe ne do iu tregojmë disa prej tyre në Unpublished.

“Më së shumti nuk kanë qenë vjedhje të llogarive bankare, më tepër ka pasur raste mashtrimi. Persona keqdashës kanë krijuar dyqane virtuale dhe tentojnë të shesin produkte, me një çmim shumë të ulët. Më tepër përpiqen të vjedhin numrat e kartave të kreditit dhe më pas bëjnë përdorimin e tyre. Ka pasur raste kur klientët kanë humbur të ardhurat e tyre përmes këtij lloji mashtrimi”,-shprehet eksperti i sigurisë Gucaj.

Ndaj ekspertët këshillojnë që duhet të tregohemi shumë të kujdesshëm kur bëjmë transaksione online, pasi rrezikojmë që të dhënat e kartave tona të vidhen nga kriminelët.

Ndiqni emisionin e plotë: