Specialistja e ISHP: Shfrytëzoni këtë periudhë për t’u vaksinuar kundër COVID-19

Shfaqja e variantit “Delta” të COVID-19 ka ngritur shqetësime në mbarë botën, ndërsa shumë shtete janë detyruar të rishikojnë masat.

Autoritetet shqiptare thonë se deri tani nuk është shënuar asnjë rast me variantin “Delta”, por gjithsesi mjekët bëjnë apel për kujdes.

E ftuar ne Euronews Albania, specialistja e Institutit të Shëndetit Publik, Iris Hasibra u shpreh se mbrojtja me efikase ndaj variantit të ri “Delta, është vaksinimi me të dyja dozat ndaj COVID-19.

“Sikurse janë raportuar edhe nga studimet që po bëhen, varianti “Delta është një variant i ndjeshëm ndaj vaksinës nëse bëhenn të dyja dozat e vaksinës”, tha ajo.

Sipas mjekes, qytetarët duhet të shfrytëzojnë periudhën aktuale pasi rastet e infektimeve janë të ulëta.

“Unë inkurajoj njerëzit të shkojnë të vaksinohen dhe të shfrytëzojnë këtë moment pak të qetë në vendin tonë, e cila ka një rritje të avashtë të pozitivitetit, por jo në nivele aq të larta”, tha specialistja e ISHP-së.

Ajo shtoi se vaksina është i vetmi mjet, që parandalon rastet e rënda të shfaqjes së COVID-19.

“Të shfrytëzojnë këtë moment që të aplikojnë vaksinën, sepse vaksina është i vetmi mjet për parandalimin e rasteve të rënda”, tha ajo.

LEXONI GJITHASHTU:

• Vaksinimi me të dyja dozat i domosdoshëm kundër variantit Delta, sipas studimit francez
• Tirana dhe Korça raportojnë numrin më të lartë të rasteve aktive me COVID-19
• Dyshime për variantin Delta, ministrja Manastirliu: Presim rezultatet nga Gjermania