Spektakël, gola dhe tension, Reali fiton ndaj Barcelonës pas 18 muajsh pritje

Plot 18 muaj i janë dashur Realit të Madridit për të rrëmbyer një fitore në “El Clasico”-n spanjolle në La Liga, ku të dielën ia doli të mposhtë rivalët e Barcelonës, madje duke i dominuar këta të fundit.

Ekipi i Xabi Alonsos buzëqeshi në fund, në një ndeshje ku nuk munguan as përplasjet dhe as rastet e shpërdoruara, më tepër në kampin madrilen.

Vendasit e nisën më mirë në “Bernabeu”-n e tejmbushur, duke gjetur avantazhin në minutën e 12-të me Mbappé, por goli u anulua për pozicion të parregullt.

Francezi nuk do të ndalej me aq, pasi 10 minuta më pas do të shënonte sërish, dhe këtë herë shifrat do të ndryshonin: 1-0 për madrilenët.

I zakonshmi Fermín López riktheu baraspeshën, por vetëm për pak, pasi Bellingham, i harruar në zonën blaugrana, ndëshkoi Barcelonën dhe rezultati shkoi në 2-1.

Në fraksionin e dytë, “galaktikët” kishin mundësinë të trefishonin, por Mbappé gaboi nga pika e bardhë e penalltisë, me gjuajtjen e tij që u ndal nga portieri Szczęsny.

Minutat e fundit, ashtu si më herët, u karakterizuan nga nervat, madje sollën edhe dy kartonë të kuq: për Pedrin në fushë dhe për Lunin në stol. Pas vërshëllimës së trefishtë, mes lojtarëve pati përplasje e shtyrje me njëri-tjetrin.

Pjesa më e madhe e madrilenëve e kishin me Yamal, i cili kishte bërë disa komente në lidhje me këtë “El Clasico”, por ndodhi e kundërta.

Reali tani është 5 pikë para katalanasve dhe udhëheq pa probleme La Ligan.