S’pranon të paguaj faturën e ujit, i moshuari kanos faturisten. Procedohet penalisht

Një 78-vjeçar është proceduar penalisht nga forcat e policisë, pasi kanosi faturisten e degës së Ujësjellës Kanalizimeve në bashkinë Mat.

I moshuari nuk ka pranuar të paguaj financiarisht detyrimet mbi konsumimin e ujit në banesën e tij, duke u konfliktuar dhe kanosur shtetasen S.F., me detyrë faturiste pranë degës së Ujësjellës Kanalizimeve.

Pas marrjes së denoncimit, efektivët e policisë kanë shkuar në vendngjarje, ku në banesën e 78-vjeçarit kanë sekuestruar 1 armë gjahu dhe 320 fishekë.

Materialet procedurale në ngarkim të tij i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.

“Shërbimet e Komisariatit të Policisë Mat, pas marrjes së njoftimit për një konflikt në lagjen “Pjetër Budi”, në qytetin e Burrelit mes një banori të kësaj lagjeje dhe punonjëses së Ujësjellësit, kanë organizuar menjëherë punën, për parandalimin e përshkallëzimit të konfliktit.

Si rezultat i vlerësimit të situatës dhe ndërhyrjes së menjëhershme, u kap dhe u shoqërua në Komisariat shtetasi S.M., 78 vjeç, banues në Burrel, për të cilin prokurori vendosi procedim në gjendje të lirë”, njofton policia.

LEXONI GJITHASHTU:

• E zuri poshtë traktori teksa punonte, humb jetën 45-vjeçari në Dimal
• Aksidentoi për vdekje këmbësorin dhe u largua nga vendngjarja, arrestohet 34-vjeçari