Starova: Ka një pasion të shtuar të Ramës për të shpërfillur Kosovën

Në emisionin Now me Erla Mëhillin, duke diskutar për zhvillimet e samitit për Ballkanin e Hapur të mbajtur gjatë dy ditëve të fundit, diplomati Arjan Starova tha se “ka një pasion të shtuar të Ramës për të shpërfillur Kosovën”.

“Unë nuk kuptoj një gjë. Pse ka një lloj pasioni që kalon deri në caqet e nervozizmit, madje duke shpërfillur Kosovën kryeministri ynë. Ai do të duhet të ishte mbështetës për Kosovën, jo të thotë ata duhet të vijnë, ne do vazhdojmë…ç’do të thotë kjo?”, tha Starova.

“Pavarësisht se çfarë themi ne, elita politike e Kosovës nuk është fare dakord me Ballkanin e Hapur”, nënvizoi ish-ministri i Jashtëm duke ngritur pyetjen se pse Mali i Zi dhe Bosnje e Hercegovina nuk i bashkohen kësaj iniciative.

“Këto janë disa vërejtje të cilat e bëjnë Open Balkan për mua – nuk po them të dështuar – por nuk besoj se do të eci”, tha Starova.

Mesditën e së martës në tryezën e “Ballkanit të Hapur” në Tiranë u firmosën 5 marrëveshjet mes kryeministrit Edi Rama, presidentit të Serbisë Aleksandër Vuçiç dhe kryeministrit të Maqedonisë së Veriut, Zoran Zaev.

Kryeministri Edi Rama teksa renditi marrëveshjet e firmosura theksoi se ato janë prova e prekshme se Ballkani i Hapur është një nismë që shtyn përpara çka është diskutuar në procesin e Berlinit, të cilat sipas tij asnjëherë nuk u realizuan.

Ai e quajti Ballkanin e Hapur një njësi zbatimi e procesit të Berlinit dhe njësi realizmi të tregut të përbashkët rajonal.