Stokholm, rritet kërcënimi terrorist pas djegies së Kuranit

Qeveria suedeze ka rritur nivelin e kërcënimit nga terrorizmi në 4 nga 5 nivele. Sipas kryeministrit Ulf Kristersson, në sytë e grupeve terroriste ndërkombëtare, Suedia është shndërruar nga një objektiv “i thjeshtë” në një objektiv “prioritar”.

Shefi i qeverisë ka saktësuar se lëvizja Hezbollah në Liban, Al Shabab në Somali dhe Al Kaeda janë mes grupeve që u kanë bërë thirrje simpatizantëve të marrin hak për djegien e Kuranit.

“E kuptoj që shumë suedezë aktualisht ndihen të shqetësuar nga niveli i ri i kërcënimit. Të gjithëve dua t’u them se duhet të vazhdojmë të jetojmë jetën tonë si zakonisht. Ne e mbrojmë shoqërinë tonë nga ata që e kërcënojnë. Ne ngrihemi për vlerat tona demokratike, por edhe vetëmbrohemi. Ngrihemi për mënyrën tonë të jetesës, por dhe e mbrojmë veten”- theksoi Ulf Kristersson, kryeministër i Suedisë.

Kërcënimet janë të lidhura në mënyrë direkte me djegiet e Kuranit, që kanë ndodhur në Suedi, por edhe në Danimarkën fqinje.

Vetëm pak ditë më parë, më 14 gusht, pavarësisht debateve mbi kërcënimet, autoritetet suedeze autorizuan djegien e Kuranit në publik, që u krye nga dy shtetas me kombësi irakene.

Në komunikimin me mediat, kryeministri Kristersson deklaroi gjithashtu se disa sulme ishin shmangur, por nuk bëri të ditur detajet.

LEXONI GJITHASHTU: 

• Shahu, një nga sporte më të preferuara të fëmijëve qytetin e Gurtë
• Hiqen çadrat e paligjshme në Ksamil, sekuestrohen 432 shezlong te Pema e Thatë