“Studentët e huaj kërcënim për sigurinë kombëtare”, Trump urdhër të ri për Harvardin

Presidenti i SHBA-së, Donald Trump, po ndërmerr hapa për të bllokuar pothuajse të gjithë studentët e huaj që të hyjnë në vend për të ndjekur studimet në Universitetin e Harvardit.

Ky veprim konsiderohet si sulmi më i fundit i administratës ndaj universitetit më të vjetër dhe më të pasur të SHBA-së.

Sipas urdhrit ekzekutiv të nënshkruar të mërkurën, administrata synon të pengojë praninë ndërkombëtare në këtë universitet të Ivy League, nga ku rrjedh një e katërta e trupit studentor.

Në dokumentin zyrtar, Trump deklaron se prania e studentëve të huaj në Harvard përbën kërcënim për sigurinë kombëtare.

“Kam përcaktuar se hyrja e klasës së shtetasve të huaj të përshkruar më sipër është e dëmshme për interesat e Shteteve të Bashkuara, sepse, sipas gjykimit tim, sjellja e Harvardit e ka bërë atë një destinacion të papërshtatshëm për studentët dhe studiuesit e huaj”, thuhet në urdhër.

Ky është një përshkallëzim i mëtejshëm i konfliktit mes Shtëpisë së Bardhë dhe universitetit.

Javën e kaluar, një gjykatë federale kishte bllokuar përkohësisht një vendim të mëparshëm të Departamentit të Sigurisë Kombëtare që synonte ndalimin e studentëve ndërkombëtarë në Harvard.

Urdhri i ri i Trump përdor një bazë tjetër ligjore – një ligj federal që i jep presidentit të drejtën të ndalojë hyrjen e të huajve në SHBA nëse konsiderohet se kjo përbën rrezik për interesat kombëtare.

Ky ligj është përdorur edhe më herët nga Trump për ndalimin e qytetarëve nga 12 vende dhe për vendosjen e kufizimeve të ashpra ndaj disa të tjerave – lëvizje të cilat u cilësuan nga kritikët si një ringjallje e “ndalimit të myslimanëve” gjatë mandatit të parë.

Në urdhrin për Harvardin përfshihen gjithashtu ligje që ndalojnë hyrjen e të huajve me lidhje me organizata terroriste.

Universiteti i Harvardit reagoi menjëherë pas publikimit të urdhrit: “Ky është një tjetër hap hakmarrës i paligjshëm nga administrata, në shkelje të të drejtave të Harvardit sipas Amendamentit të Parë të Kushtetutës,” thanë zyrtarët e universitetit.

Përplasja midis Harvardit dhe administratës ka nisur prej muajsh, kryesisht për shkak të refuzimit të universitetit për të ndarë me autoritetet federale të dhëna mbi sjellje të dyshimta të disa studentëve të huaj.

Ndërkohë, administrata Trump ka kërkuar ndryshime në politikat e qeverisjes së Harvardit, duke e akuzuar atë për tolerim të retorikës anti-hebraike dhe për përhapje të ideologjisë liberale.

Për rreth 6,800 studentë të huaj që aktualisht studiojnë në Harvard, Sekretari i Shtetit Marco Rubio do të vendosë nëse do t’u revokohen vizat. Urdhri është parashikuar të jetë në fuqi për gjashtë muaj, me mundësi rinovimi.

Vendimi për vazhdimësinë e tij do të merret brenda 90 ditëve.

LEXONI GJITHASHTU:

• SHBA ndalon hyrjen për shtetasit e 12 vendeve, Trump publikon listën
• Kremlini akuza Perëndimit për përfshirje në “sulme terroriste” ndaj civilëve në Rusi