Studim| Dietat e shëndetshme ndikojnë në aftësi më të mira njohëse në pleqëri

Një studim i ri tregon se një dietë e shëndetshme gjatë gjithë jetës lidhet me aftësi më të mira njohëse në pleqëri. Kërkuesit që kanë ndjekur një grup prej mbi 3,000 personash që nga lindja në vitin 1946 kanë zbuluar se ata që kanë konsumuar më shumë perime, fruta, legume dhe drithëra të plota kanë pasur aftësi më të larta njohëse me kalimin e kohës.

Sipas studimit, personat që kanë filluar të ushqehen shëndetshëm që nga fëmijëria dhe para moshës 50 vjeçare kanë përfituar më shumë. Për shembull, vetëm 8% e atyre me aftësi të larta njohëse kishin dieta me cilësi të ulët, ndërsa 58% e atyre me aftësi të ulëta kishin dieta të dobëta. Ky studim sugjeron që zakonet ushqimore të hershme mund të ndikojnë në vendimet ushqimore më vonë dhe të kenë efekt kumulativ në aftësitë njohëse globale.

Hulumtimi tregon se ushqimi i shëndetshëm në fëmijëri dhe gjatë moshës së mesme mund të ketë ndikim të madh në zhvillimin njohës dhe në parandalimin e rënies njohëse dhe demencës. Këto rezultate janë prezantuar në konferencën vjetore të Shoqatës Amerikane për Ushqim në Çikago, por ende nuk janë publikuar.

Studiuesit theksojnë se nevojiten më shumë kërkime për të kuptuar lidhjen midis ushqyerjes dhe shëndetit të trurit në grupe të ndryshme etnike dhe sociale. Megjithatë, mesazhi kryesor është rëndësia e kujdesit për dietën e fëmijëve në shkolla, gjatë zhvillimit dhe në shtëpi, për të përmirësuar mirëqenien e tyre në të ardhmen.

LEXO GJITHASHTU:

• Emergjenca humanitare në Gaza, zyrtarë të OKB: S’ka ujë e ushqime, drejt katastrofës
• Nutricionisti: Diabeti eleminohet gradualisht përmes një diete frutash