Studimi, testohet terapia gjenetike që synon rinovimin e qelizave të plakura

Një terapi gjenetike që synon të rinovojë qelizat e plakura dhe të rikthejë funksionin e tyre është testuar për herë të parë në histori tek një pacient.

Kompania amerikane Life Biosciences me seli në Boston, ka zhvilluar terapinë e quajtur ER-100, e cila shërben për pacientët me dëmtime të nervit optik dhe përdor tre proteina të njohura si faktorët OSK. Këto proteina veprojnë si një lloj “rivendosjeje” biologjike, duke synuar t’i kthejnë qelizat e dëmtuara në një gjendje më të re dhe më funksionale.

Aktualisht trajtimi po testohet tek pacientët me glaukomë dhe forma të tjera të dëmtimit të nervit optik që mund të çojnë në humbje të shikimit. Kjo është faza e parë e provave klinike dhe synon të vlerësojë sigurinë e terapisë tek njerëzit.

Nëse rezultatet do të jenë pozitive, ekspertët thonë se kjo mund të shënojë një hap të rëndësishëm në mjekësinë rigjeneruese dhe në përpjekjet për të trajtuar sëmundjet që lidhen me moshën.

Shkencëtarët besojnë se plakja lidhet jo vetëm me dëmtimet e organizmit, por edhe me ndryshimet në mënyrën se si aktivizohen ose çaktivizohen gjenet. Terapia synon të korrigjojë këto ndryshime dhe të rikthejë funksionin normal të qelizave.