Stuhia bllokon aksin Fier–Cakran, rrëzohen pemët e dëmtuara nga zjarret

Një stuhi e papritur që shpërtheu rreth orës 13:30 ditën e sotme ka shkaktuar një bllokim të përkohshëm të aksit të vjetër rrugor Fier–Cakran.

Shkak për këtë ka qenë rrëzimi i disa pemëve pishe, të cilat ishin djegur nga zjarret e mëparshme dhe nuk i kishin rezistuar erës së fortë. Pemët janë rrezuar mbi rrugë, duke paralizuar për disa minuta lëvizjen e automjeteve.

Forcat zjarrfikëse kanë mbërritur menjëherë në vendngjarje dhe kanë hequr pemët, duke rikthyer normalitetin në qarkullim. Megjithatë, rreziku mbetet ende i pranishëm, pasi përgjatë këtij aksi rrugor ndodhen ende dhjetëra pemë të dëmtuara, të cilat mund të bien në çdo moment, duke rrezikuar sërish sigurinë e kalimtarëve dhe të automjeteve.

Autoritetet u bëjnë apel qytetarëve që të jenë të kujdesshëm gjatë kalimit në këtë aks, pasi kushtet e motit dhe struktura e pemëve të dëmtuara mund të krijojnë rrezikshmëri.

LEXONI GJITHASHTU:

• Stuhi dhe reshje shiu në juglindje, dëme në Maliq dhe vështirësi në qarkullim
• Stuhia lë pa energji elektrike disa zona në Durrës, shkak dëmtimi i linjës kryesore