Stuhia e dëborës godet malin Everest, bllokohen 200 alpinistë, qindra evakuohen

Më shumë se 200 alpinistë kanë mbetur të bllokuar në anën tibetiane të Malit Everest, pasi një stuhi e fuqishme dëbore goditi zonën në fundjavë, në kulmin e fluksit turistik gjatë festës kombëtare tetëditore në Kinë.

Sipas mediave shtetërore kineze, deri tani janë evakuuar 350 persona, ndërsa mbi 200 të tjerë janë kontaktuar dhe po priten për t’u shpëtuar.

Mediat lokale fillimisht raportuan se rreth 1,000 alpinistë kishin mbetur të bllokuar, ndërkohë të hënën, media shtetërore kineze raportoi se 350 persona u evakuuan.

Personat e shpëtuar të dielën janë dërguar në qytezën e vogël Qudang, në anën tibetiane të majës.

Qindra fshatarë vendas dhe ekipe shpëtimi janë vendosur për të pastruar borën që bllokon hyrjen në zonë, e cila ndodhet në një lartësi prej më shumë se 4,900 metrash.

Reshjet e dendura të dëborës në luginë, e cila shtrihet në një lartësi mesatare prej 4,200 metrash (13,800 këmbë), filluan të premten në mbrëmje dhe vazhduan gjatë gjithë të shtunës.

Sipas njoftimeve në llogaritë zyrtare të WeChat të Kompanisë lokale të Turizmit të Qarkut Tingri, shitja e biletave dhe hyrja në të gjithë Zonën Panoramike të Everestit u pezulluan që nga e shtuna.

“Ishte shumë lagështirë dhe ftohtë në male, dhe hipotermia ishte një rrezik real”, tha Chen Geshuang, i cili ishte pjesë e një ekipi prej 18 personash për ecje në male që arriti në Qudang.

Ekipet po vijojnë punën e shpëtimit për alpinistët e bllokuar, raporton The Gurdian.

Everesti, maja më e lartë në botë me 8,849 metra lartësi, është një prej destinacioneve më të njohura për alpinistët, por ngjitja e tij mbetet jashtëzakonisht e rrezikshme. Reshjet e borës e kanë bërë të pakalueshme zonën për qindra vizitorë dhe udhëtime janë anuluar.

LEXONI GJITHASHTU:

• Macron emëron qeverinë e re, kritika nga udhëheqësit politikë
• “Putin tallet me Perëndimin”, Zelensky: Reagimi ndaj agresionit rus është i dobët