Sulm i përgjakshëm në gjykatën e Iranit, grupi xhihadist vret 6 civilë

Të paktën gjashtë civilë, përfshirë një nënë dhe një fëmijë, kanë humbur jetën dhe 22 persona të tjerë janë plagosur si pasojë e një sulmi të armatosur të ndërmarrë nga grupi separatist xhihadist Jaish al-Adl në një gjykatë në provincën juglindore të Iranit, Sistan-Baluchestan, raportuan mediat iraniane të shtunën.

Sipas burimeve lokale, sulmi nisi me të shtëna brenda ndërtesës së gjykatës dhe u pasua nga një sulm i dytë me mortaja dhe granatahedhës, duke shkaktuar panik dhe viktima mes civilëve. Më pas, ndodhi një përleshje e armatosur që zgjati tre orë me forcat iraniane të sigurisë.

Agjencia shtetërore iraniane njoftoi se tre sulmues të armatosur u vranë gjatë përleshjes, ndërsa disa nga të plagosurit ndodhen në gjendje kritike dhe janë dërguar në spitalet lokale për trajtim.

Grupi Jaish al-Adl mori përgjegjësinë për sulmin përmes një deklarate në Telegram, duke u bërë thirrje civilëve të evakuonin zonën “për sigurinë e tyre”. Dëshmitarë lokalë raportuan shpërthime të fuqishme dhe të shtëna me armë, ndërsa forcat iraniane mbyllën disa rrugë që të çojnë në gjykatë.

LEXONI GJITHASHTU:

• Trump i drejtohet Evropës: Merrni masa për imigracionin para bisedimeve SHBA-BE
• Britania rrit mbështetjen për Gazën: Ekip ushtarak në ndihmë të Jordanisë