Sulm masiv rus në Zaporizhzhia të Ukrainës: Një i vdekur dhe 13 të plagosur

Forcat ruse kryen një sulm të madh në orët e para të së martës në qytetin juglindor të Zaporizhzhzhisë në Ukrainë, duke vrarë një 41-vjeçar, plagosur 13 persona të tjerë dhe shkaktuar dëme të konsiderueshme në infrastrukturë, njoftoi guvernatori rajonal Ivan Fedorov.

Sipas Fedorovit, mes të plagosurve ndodhen edhe dy fëmijë. Pamjet e publikuara prej tij tregojnë zjarrfikës duke luftuar me flakët në disa ndërtesa banimi dhe shtëpi private.

Shërbimet e emergjencës së Ukrainës raportuan se zjarret përfshinë një sipërfaqe prej rreth 350 metrash katrorë në tre ndërtesa banimi dhe 600 metra katrorë në një stacion shërbimi.

Forcat ruse dyshohet se përdorën sisteme të shumëfishta lëshimi raketash për të kryer rreth 10 sulme, të cilat dëmtuan 10 pallate dhe 12 shtëpi private, sipas të dhënave paraprake nga autoritetet lokale.

Zaporizhzhia, që ndodhet afër vijës së frontit në juglindje të Ukrainës, vazhdon të jetë një nga zonat më të goditura nga sulmet ajrore që prej nisjes së agresionit rus në shkurt 2022.

LEXONI GJITHASHTU:

• Ushtria izraelite nis sulme të fuqishme në Gaza, situata rëndohet
• Zelensky thirrje Trumpit: Mbaj qendrim të qartë ndaj Putinit, ai po teston NATO-n