Sulmet kibernetike, Çuçi: Fenomene që s’përballohen pa mbështetje

Ministri i Brendshëm Bledi Çuçi shprehet se sulmi kibernetik ndaj Shqipërisë tregoi se asnjë vend nuk mund të përballojë i vetëm, pa mbështetje, këto sulme.

Gjatë fjalës së tij në tryezën me përfaqësues të drejtësisë dhe Bashkimit Europian, Çuçi deklaroi se vendet si SHBA dhe disa vende europiane i erdhën në ndihmë Shqipërisë pas sulmit iranian.

“Të gjithë ndajmë të njëjtin opinion që sfidat në fushën e sigurisë dhe sundimit të ligjit, janë shumë komplekse. Mjafton të përmendim situatën e pazakontë që po përballet sot Policia dhe agjenci të tjera të qeverisë me sulmin kibernetik. Nëse deri dje ka qenë lufta klasike e institucioneve ligjzbatuese për fenomene si krimi i organizuar, lufta kundër drogës dhe terrorizmit, për të cilat kemi krijuar stabilitet lidhur me bashkëpunimin me partnerët, tani po përballemi me luftra të reja siç është lufta kibernetike. Ky sulm na tregoi që asnjë vend nuk mund të përballojë i vetëm këto fenomene, e jo më një vend i vogël në zhvillim siç është Shqipëria”, tha Çuçi.

Një ditë më parë, FBI dhe Agjencia e Sigurisë Kibernetike dhe Sigurisë së Infrastrukturës (CISA) publikuan një raport të përbashkët për sulmet kibernetike ndaj Shqipërisë.

Në raport thuhet se qeveria iraniane, e identifikuar me ‘Homeland Justice’ nisi sulmin në korrik të 2022 kundër portaleve qeveritare shqiptare duke bllokuar përkohësisht shërbimet online.

LEXONI GJITHASHTU:

• FBI-CISA raport për sulmet kibernetike: Hakerat 14 muaj në rrjetin e qeverisë
• Ekipi i NATO-s në Tiranë për sulmet kibernetike