Sulmet kibernetike në linjat ajrore shkaktojnë vonesa në aeroportet evropiane

Sulmet kibernetike në sistemet e linjave ajrore gjatë orëve të fundit kanë shkaktuar ndërprerje të fluturimeve në disa vende evropiane, përfshirë Heathrow-n e Londrës, Brukselin dhe Berlinin, thanë autoritetet të shtunën.

Aeroporti i Brukselit konfirmoi të paktën katër anulime fluturimesh të shtunën në mëngjes, përfshirë nisjet për në Ruandë dhe Amsterdam, pas sulmit të së premtes në mbrëmje, i cili shkatërroi sistemet e automatizuara të regjistrimit dhe hipjes në bord.

Aeroporti tha se ishin në dispozicion vetëm procedurat e regjistrimit manual, duke paralajmëruar për një “ndikim të madh në orarin e fluturimeve”, me më shumë vonesa dhe anulime të pritshme.

Aeroporti i Berlinit gjithashtu paralajmëroi pasagjerët për “kohë pritjeje më të gjata se zakonisht” për shkak të incidentit.
“Po punojmë për një zgjidhje të shpejtë”, tha aeroporti në një njoftim në faqen e tij të internetit.

Aeroporti Heathrow i Londrës gjithashtu paralajmëroi udhëtarët për vonesa, duke përmendur një “problem teknik” në Collins Aerospace – një kompani që ofron sisteme regjistrimi dhe hipjeje në bord për disa linja ajrore në nivel global.
“U këshillojmë pasagjerëve të kontrollojnë statusin e fluturimit të tyre me linjën ajrore përpara se të udhëtojnë”, thuhej në deklaratë, duke shtuar se ishte vendosur staf shtesë për të ndihmuar.

Collins konfirmoi se sulmi kishte në shënjestër softuerin e saj MUSE, i cili përdoret për regjistrimin e pasagjerëve dhe dorëzimin e bagazheve në disa aeroporte, raportoi e përditshmja britanike The Independent.

“Ndikimi është i kufizuar në regjistrimin elektronik të klientëve dhe dorëzimin e bagazheve, dhe mund të zbutet me operacione manuale”, tha kompania në një deklaratë, duke shtuar se po punon për të rivendosur funksionalitetin e plotë “sa më shpejt të jetë e mundur”.

EasyJet deklaroi se operacionet e saj mbeten të paprekura, pavarësisht ndërprerjes.
Autoritetet në Bruksel dhe Berlin bënë të ditur se kohëzgjatja e ndërprerjes mbetet e paqartë, ndërsa përpjekjet vazhdojnë për të zgjidhur situatën e lidhur me sulmin kibernetik.

LEXONI GJITHASHTU:

• Sulmet ruse në Ukrainë, Polonia dhe aleatët e NATO-s ngritin avionët luftarakë
• Franca përgatitet të njohë Shtetin e Palestinës më 22 shtator