Sulmet kibernetike në RMV, dyshime se hakerat financohen nga Irani dhe Rusia

Këtë e ka konfirmuar vetë policia, ndërsa ministri i brendshëm Oliver Spasovski theksoi se këto sulme kibernetike kanë pasur për qëllim ndjelljen e frikës dhe destabilizimin e vendit.

Kërcënimet janë dërguar nga 60 e-maile të ndryshme, ndërsa autoritetet presin përgjigje nga ekspertë të huaj të fushës për të zbuluar rrjetet private.

 “Kemi zbuluar disa grupe, për të cilat po bëhet dokumentimi i plotë i veprimtarisë së jashtëligjshme. Presim një përgjigje nga ekspertë të fushës për mënyrën se si kanë vepruar dhe se kush qëndron pas këtyre sulmeve kibernetike”,-tha Oliver Spasovski, Ministër i Brendshëm i RMV-së

Nga ana tjetër kryeprokurori i vendit ngre alarmin se mjetet që posedon Maqedonia e Veriut për zbulimin e këtyre hakerave janë të pakta. Ai kërkoi më shumë buxhet për të modernizuar repartin e sistemit mbrojtës.

 “Duhet të shkojmë deri tek burimi i kërcënimeve, të zbulojmë motivet e tyre dhe qëllimet. Na duhet dinamikë veprimi dhe më shumë mjete. Për këtë gjë duhen shumë para dhe punë për të mbrojtur sistemet që kanë akses qytetarët”,- tha Gavrill Bubevski, kryeprokuror i repartit për krimin e organizuar

Në 6 muajt e fundit mbi 720 institucione publike në RMV kanë rënë pre e kërcënimeve përmes alarmeve për bombë. Bëhet fjalë për shkolla, qendra tregëtare, institucione shtetërore, të cilat kanë shkaktuar panik dhe kaos tek qytetarët.

Jo vetëm kaq, por pre e sulmeve kibernetike ka rënë edhe sistemi elektronik i fondit të shëndetësisë duke lënë pa paga punonjësit e këtij sektori.

Përveç se në Maqedoni, pre e këtyre sulmeve kanë rënë thuajse të gjitha vendet e Ballkanit që pas nisjes së agresionit në Ukrainë.

LEXONI GJITHASHTU:

• 100 milionë dollarë për 27 ura, projekti nis në shtator me “Urën e Beshirit”
• Sezoni veror në prag, Unioni Turistik Shqiptar: Kemi mungesa për punëtorë