Sulmi i Indisë në Pakistan, humbasin jetën 8 persona, mes tyre një fëmijë

India nisi mbrëmjen e të martës “Operacionin Sindoor” duke goditur disa zona në të gjithë Pakistanin në hakmarrje ndaj sulmit të muajit të kaluar në Pahalgam në Kashmirin e administruar nga India.

Forcat e Armatosura të Pakistanit thanë se ushtria e Indisë sulmoi gjashtë lokacione në Pakistan, duke vrarë të paktën tetë persona, përfshirë një vajzë 3-vjeçare.

Ushtria indiane thotë se zjarri i artilerisë pakistaneze vrau tre persona në Kashmirin e administruar nga India.

Zyrtarët pakistanezë pretendojnë se forcat e tyre kanë rrëzuar pesë avionë luftarakë indianë dhe kanë marrë robër disa ushtarë indianë. India nuk ka komentuar menjëherë.

Kryeministri pakistanez Shehbaz Sharif tha se sulmi i Indisë ishte “i paprovokuar” dhe se vendi i tij po përgjigjej me vendosmëri.

Ambasada Indiane në Uashington, DC, tha se “veprimet e Indisë” ishin “të fokusuara dhe të sakta”.

Presidenti i SHBA-së, Donald Trump ka reaguar duke e quajtur situatën “një turp” dhe duke shtuar se shpreson që “të përfundojë shpejt”.

Gjithashtu Ministritë e jashtme të Kinës dhe Emirateve të Bashkuara Arabe kanë bërë thirrje për përmbajtje nga të dyja palët.

LEXONI GJITHASHTU:

• India nis sulm me raketa kundër Pakistanit
• India shkatërron shtëpitë e të dyshuarëve për sulmin vdekjeprurës në Kashmir