Superliga Shqiptare: Garë e fortë për kreun, 3 ekipe luftojnë për vendin e parë

Gara për kreun në Superligën shqiptare vijon të jetë e fortë, ku Partizani, Dinamo e Vllaznia janë me nga 37 pikë. Secila prej tyre mori fitore në javën e 21-të, ashtu si dhe Egnatia e Bylis.

Për herë të parë pas shumë vitesh gara për kreun në elitën e futbollit shqiptar vijon të jetë e fortë, me ekipet të cilat nuk lëshojnë terren ndaj njëra-tjetrës. Partizani, Dinamo e Vllaznia, pak pas tyre Egnatia janë 4 ekipet që po forcojnë më tepër pozitat e me gjasa do të jenë pjesë e final 4 pas 15 javësh. Me pikë të barabarta, por në krye të klasifikimit qëndron Partizani, që të dielën fitoi pastër ndaj Teutës në shifrat 0-2. Një autogol i Simeu e më pas Podstrelau vulosën fitoren për të kuqtë.

E diela rezultoi e suksesshme edhe për Dinamon e Vllazninë, me shkodranët që shënuan poker në portën e Skënderbeut, ndërsa nëndetësja fitoi ndaj Elbasanit. Në Korçë temperaturat janë ulur ndjeshëm, 16 pikë në fund të klasifikimit. Me tripletën e Balajt dhe golin e Malës, shkodranët nuk hasën vështirësi. Dinamo e Ilir Dajës fitoi në shifrat 3-1 ndaj Elbasanit, të cilin e ka mposhtur 3 herë këtë edicion.

Në krizë duket edhe Tirana që të shtunën u dorëzua totalisht ndaj Egnatias, pasi në harkun kohor të 45 minutave pësoi 4 herë, për më tepër dominim absolut i rrogozhinasve. Kjo ishte humbja e 4ët në 5 javët e fundit, ndërsa raportohet se trajneri Magani ka kërkuar largimin. Surpriza e javës ishte Bylis që mposhti Laçin dhe u ngjit në vendin e 6-të.

LEXONI GJITHASHTU:

• Dorëheqja e Maganit, Tirana rikthen në pankinë ish-trajnerin
• Tirana gjen zëvendësuesin e Shkëmbit, prezantohet trajneri i ri