Sveçla inspekton urën e Ibrit: Kjo çështje është mbyllur, s’ka lidhje me dialogun

Ministri i Brendshëm i Kosovës, Xhelal Sveçla inspektoi sot urën e Ibrit pak pasi u mbyll protesta e banorëve serbë kundër vendimit për hapjen e saj.

Në një prononcim për mediat Sveçla tha se ishte një inspektim rutinë për të bërë disa matje, ndërsa theksoi se vendimi për hapjen e kësaj ure është i pakthyeshëm dhe nuk ka lidhje me dialogun.

“Planin e kemi ndarë me bashkëpunëtorët, nuk po shoh asgjë të jashtëzakonshme. Kjo është një çështje e mbyllur, nuk ka lidhje me dialogun, është çështje e të drejtës për t’u hapur dhe çështje e një vendimi që e dini. Ata (serbët) kanë të drejtë të protestojnë, është një e drejtë demokratike”, tha Sveçla.

Qeveria e kryeministrit të Kosovës, Albin Kurti, në mes të korrikut njoftoi se synon të hapë urën kryesore mbi lumin Ibër në Mitrovicë.

Megjithatë, vendet e QUINT-it – SHBA, Britania e Madhe, Gjermania, Franca dhe Italia – më 2 gusht deklaruan se nuk e mbështesin hapjen për trafikun në këtë moment. Misioni i NATO-s në Kosovë, KFOR, ka deklaruar se çdo vendim për hapjen e urës kryesore mbi lumin Ibër duhet të merret në kuadër të dialogut mes Kosovës dhe Serbisë, që ndërmjetësohet nga Bashkimi Evropian.

LEXONI GJITHASHTU:

• Serbët protestojnë në Mitrovicë të Veriut kundër hapjes së urës mbi Ibër
• Ministrat e Kosovës inspektojnë urën e Ibrit, planifikohet të hapet së shpejti