Takimi Meloni-Zelensky, kryeministrja italiane: Rusia të tregojë gatishmëri për paqe

Pas funeralit të Papa Françeskut në prani të liderëve të shumtë botërorë, presidenti ukrainas Volodymyr Zelensky u takua me kryeministren italiane Giorgia Meloni në Palazzo Chigi.

Biseda mes të dyve ka zgjatur pak më pak se një orë. Sipas një shënimi të lëshuar nga Palazzo Chigi, gjatë bisedimeve “liderët përsëritën mbështetjen e tyre për përpjekjet e Presidentit Trump për të arritur një paqe të drejtë dhe të qëndrueshme, të aftë për të garantuar një të ardhme sigurie, sovraniteti dhe lirie për Ukrainën”.

“Meloni shprehu, gjithashtu në emër të qeverisë, ngushëllimet e saj për viktimat e sulmeve të fundit ruse, duke ripërtërirë dënimin e saj të vendosur për akte të tilla dhe duke theksuar urgjencën e një armëpushimi të menjëhershëm dhe të pakushtëzuar, si dhe nevojën për një angazhim konkret nga Moska për fillimin e një procesi paqeje”, vazhdoi deklarata.

Kryeministri “përshëndeti gatishmërinë e plotë të Ukrainës për një armëpushim të menjëhershëm. Tani pritet që Rusia gjithashtu të tregojë konkretisht vullnetin e saj për të ndjekur paqen,” përfundon shënimi.

Më parë, Zelensky pati bisedime private brenda Bazilikës së Shën Pjetrit me Presidentin e SHBA Donald Trump, si dhe me presidentin aktual të Pallatit Elysée Emmanuel Macron dhe kryeministrin britanik Keir Starmer.

“Të shohësh Donald Trump dhe Volodymyr Zelensky duke folur për paqen në funeralin e “Papës së Paqes” ka një rëndësi të madhe,” tha Meloni për të përditshmen La Repubblica, duke e quajtur atë një “ditë historike”.

Zelensky dhe Starmer gjithashtu patën një takim dypalësh në kopshtet e Villa Wolkonsky. Ishte planifikuar gjithashtu një takim midis Zelensky dhe Presidentes së Komisionit Evropian Ursula von der Leyen.

LEXONI GJITHASHTU:

• “Kam frikë të ardhmen”,-nëna e djalit autik tregon vështirësitë e kaluara në 19 vite
• Pengu i Frederik Ndocit, rrëfehet kantautori: Po të kisha lindur dje…