Talasemia, asnjë fëmijë i lindur me këtë sëmundje në Shqipëri në dy vitet e fundit

Në Ditën Botërore të Talasemisë, mjekët njoftojnë lajmin e mirë se prej dy vitesh nuk ka lindur asnjë fëmijë me këtë sëmundje ndërsa Shqipëria numëron 350 pacientë, të cilët trajtohen në QSUT.

“Parandalimi ka funksionuar. Çiftet e reja janë të informuar dhe depistohen për situatën gjenetike që ata kanë. Gjatë dy viteve të fundit, ne jemi thuajse drejt zeros së lindjeve të fëmijëve me talasemi. As vitin e kaluar dhe as këtë vit nuk kemi lindje të reja. Kemi vetëm një fëmijë 1,5 vjeç me talasemi major, por që edhe ai është në procedurë për të kryer transplantin e qelizave staminale,” thotë Manika Kreka, onkohematologe pediatre në QSUT.

Parandalimi i komplikacioneve është një tjetër sfidë për këta pacientë.

“Si pasojë e anemisë, që sjell pasoja në organet e tjera vitale, duke shkaktuar probleme kardiake, hematologjike, infektive etj., këta pacientë monitorohen rregullisht, duke evituar edhe komplikacionet që vijnë si pasojë e kësaj patologjie. Në QSUT bëhen edhe analizat gjenetike për të mundësuar parandalimin e fëmijëve me këtë patologji,” thotë Alma Cani, drejtoreshë e QSUT.

Shqipëria është një vend me endemicitet të lartë të beta-talasemisë. Shpërndarja e bartësve është heterogjene dhe frekuenca më e lartë është në Lushnjë, Berat, Fier, Sarandë dhe Shkodër.

LEXONI GJITHASHTU:

• Elbasan, besimtarët e Komunitetit Ungjillor dhurojnë gjak për fëmijët talasemikë
• Gjirokastër| Punonjësit e Policisë dhurojnë gjak për fëmijët talasemikë