Talebanët kryejnë ekzekutimin e gjashtë prej kthimit në pushtet

Talebanët e ekzekutuan një burrë të dënuar për vrasje, të mërkurën në një stadium sporti. Ai është personi i gjashtë i ekzekutuar në publik prej se grupi radikal islamist u kthye në pushtet në vitin 2021.

Ekzekutimi u krye me armë zjarri nga një anëtar i familjes së viktimës në qytetin Gardez, i cili është kryeqytet i provincës lindore Paktia.

Kisas, apo dënimet ndëshkuese islamike, ku mund të përfshihen edhe vrasjet prej duarve të familjeve të viktimave, kanë qenë tipar dallues i talebanëve kur ata ishin në pushtet në Afganistan për herë të parë nga viti 1996 deri më 2001.

Gjykata Supreme talebane njoftoi në X se “një vrasës u dënua me ndëshkim hakmarrës”, duke e publikuar emrin e tij si Mohammad Ayaz Asad.

Mediat raportuan se Ayaz Asad u ekzekutua me tre plumba në gjoks.

Sipas gjykatës, Asadi e kishte vrarë një burrë me emrin Saif-ul-Qatal me pushkë Kallashnikov. Nuk është e qartë nëse Ayaz Asad e kishte pranuar fajin ose nëse ishte deklaruar i pafajshëm për akuzat.

Dënimi me vdekje ishte aprovuar nga lideri i Gjykatës Supreme talebane, Mullah Hibatullah Akhundzada, pas “shqyrtimit të kujdesshëm” nga tri gjykata ushtarake talebane, thuhej në njoftim.

Anëtarë të lartë të Qeverisë talebane, përfshirë ministrin e Brendshëm në detyrë, Sirajuddin Haqqani, morën pjesë në ekzekutim.

Haqqani është lider i rrjetit Haqqani, i cili është i shpallur grup terrorist nga Shtetet e Bashkuara dhe cilësohet si ndër grupet më të dhunshme të Afganistanit.

LEXONI GJITHASHTU:

• Talebanët festojnë trevjetorin e marrjes së pushtetit në Afganistan
• Talebanët urdhërojnë mbylljen e salloneve të bukurisë në të gjithë Afganistanin