Talibanët arrestojnë dy gazetarë në Afganistan

Autoritetet e talibanëve i kanë arrestuar dy gazetarë në jug të Afganistanit, ku është ndaluar që të transmetohet zëri i grave nëpër radio.

Një burim anonim, i ka thënë Radios Evropa e Lirë se forcat talibane i kanë arrestuar gazetarët Attaullah Omar dhe Waheedur Rahman Afghanmal në provincën jugore Kandahar, më 13 gusht.

Omar është korrespodent i Kandaharit për mediumin Tolo, ndërsa Afghanmal raporton për të përditshmen Etilat-e Roz.

Arrestimi i tyre vjen pas arrestimit të pesë gazetarëve tjerë në pjesë të ndryshme të Afganistanit, vetëm brenda një muaji.

Ndërkohë, Ministria e talibanëve për Informacion dhe Kulturë i ka urdhëruar radio-stacionet në provincat jugore të Helmandit, që të mos i transmetojnë zërat e grave, as nëpër reklama.

“Të gjitha radio stacionet në Helmand janë paralajmëruar që nëse transmetojnë zëra të grave, do të mbyllen dhe pronarët e tyre do të ndëshkohen”, ka thënë menaxheri i një stacioni.

Komiteti për Mbrojtje të Gazetarëve u ka bërë thirrje talibanëve që të ndalin fushatën e tyre për shtypje ndaj shtypit.

“Shtypja ndaj mediave është duke e izoluar Afganistanin nga pjesa tjetër e botës në një kohë kur shteti është duke u përballur me emergjencat më të mëdha humanitare”, ka thënë mes tjerash Komiteti.

Pavarësisht premtimeve për shtyp të lirë, pas kthimit të talibanëve në pushtet dy vjet më parë, ata i kanë mbyllur radiot, televizionet dhe gazetat e pavarura. Qindra gazetarë kanë ikur nga shteti.

LEXONI GJITHASHTU:

• Emergjenca e emigrantëve/ Mannino: Plagë e hapur për njerëzimin, Evropa ta mjekojë
• VIDEO| Shpërthen vullkani Etna, pezullohen fluturimet për në Katania