Tarifat në universitet, Shqipëria të njëjtin nivel me RMV, Kosova heq pagesat

Një student i universitetit publik në Shqipëri paguan tarifë vjetore nga 161 deri në 322 euro. Kjo është pagesa vjetore në ciklin e parë Bachelor. Sipas nivelit, Shqipëria është më pranë Maqedonisë së Veriut, aty ku tarifa varion nga 124 deri në 423 euro. Ndërkaq, në Kosovë studentët të cilët deri dje paguanin 25-50 euro, nuk do të paguajnë më tarifë studimi.

Në rajon Serbia dhe Bosnja kanë tarifat më të shtrenjta, të cilat në disa universitete arrijnë deri në 2 mijë euro.

Nga rajoni shihet një hendek i madh tarifor midis vendeve si Rumania apo Bullgaria e Kroacia, të tria shtete anëtare të Bashkimit Evropian.

Universitetet bullgare tarifojnë 150 deri në 870 euro për ciklin e parë të studimeve, ndërsa Rumania aplikon shifra përtej mesatares së rajonit, deri në 7000 euro. Kroacia është vendi më i lirë për studentët nga rajoni ballkanik me tarifa që variojnë nga 17 deri në 66 euro.