Tarifat shtesë të Trump, Komisioni Evropian: Dialogu është përparësi, jo përshkallëzimi

Komisioni Evropian ka deklaruar se prioriteti i BE-së është dialogu dhe jo përshkallëzimi. Kjo deklaratë vjen në përgjigje të kërcënimeve të presidentit të SHBA-së Donald Trump për të vendosur tarifa shtesë ndaj gjashtë vendeve të BE-së nga 1 shkurti, ndërsa ai shtyn përpara kontrollin e Grenlandës.

Presidenti i Këshillit Evropian, Antonio Costa po bën thirrje për një takim urgjent të udhëheqësve evropianë të enjten në Bruksel për të koordinuar përgjigjen evropiane.

Gjatë konferencës së sotme për shtyp nga Komisioni Evropian, Komisioneri i Tregtisë Olof Gill theksoi se janë duke u zhvilluar konsultime intensive midis udhëheqësve të BE-së dhe Ursula von der Leyen. Sipas tyre një përshkallëzim i tensionit do të dëmtonte konsumatorët dhe bizneset në të dy anët e Atlantikut.

I pyetur nëse BE-ja po shqyrtonte vendosjen e tarifave ndaj SHBA-së, Olof Gill theksoi se BE-ja ka mjetet e nevojshme dhe është gati të përgjigjet, duke bërë gjithçka që është e nevojshme për të mbrojtur interesat e saj ekonomike.

Zëdhënësi i Komisionit tha gjithashtu se nuk ka një takim të planifikuar midis Ursula von der Leyen dhe Donald Trump në forumin ekonomik të Davosit në ditët në vijim, pa përjashtuar megjithatë mundësinë e një takimi të tillë.