“Të hiqen masat ndëshkuese”, Gërvalla në Luksemburg: Kosova meriton mbështetje

Ministrja në detyrë e Punëve të Jashtme Donika Gërvalla kërkoi ditën e djeshme në takimin e ministrave të Jashtëm të BE-së në Luksemburg, mbështetje të qartë për aspiratat e vendit tonë për anëtarësim në BE dhe NATO, duke theksuar rëndësinë e këtyre proceseve jo vetëm për Kosovën, por edhe stabilitetin rajonal dhe evropian.

Gërvalla përmendi tre hapa urgjentë që kërkohen tani, e që kontribuojnë jashtë mase në stabilizimin e rrethanave në rajonin e Ballkanit Perëndimor dhe hapjen e rrugës për integrimin e rajonit në BE.

Hapat në fjalë janë: heqja e masave ndëshkuese të BE-së ndaj Kosovës, përfundimi i procesit të anëtarësimit të Kosovës në Këshillin e Evropës, si dhe mbështetja për aplikimin e Kosovës për anëtarësim në BE.

Gërvalla nënvizoi përkushtimin e plotë të Qeverisë së Kosovës ndaj dialogut të lehtësuar nga BE me Serbinë, dhe zbatimit të marrëveshjes së Brukselit dhe Aneksit të Ohrit të vitit 2023.

Ajo theksoi se ky proces duhet të çojë drejt njohjes reciproke dhe ndërtimit të marrëdhënieve të fqinjësisë së mirë, mbi bazën e barazisë dhe vlerave evropiane.

Gërvalla kërkoi nga BE-ja edhe veprime ndaj Serbisë e cila në vazhdimësi e mohon marrëveshjen dhe vepron në kundërshtim me dispozitat e saj.

Në dritën e kërcënimeve të vazhdueshme nga Serbia dhe ndikimit rus në rajon,  Gërvalla bëri thirrje për mbështetje të fuqishme për aspiratat e Kosovës për anëtarësim në NATO dhe llogaridhënie për aktin e hapur të agresionit në Banjskë, si çështje kyçe për sigurinë rajonale dhe integritetin e BE-së.

LEXONI GJITHASHTU:

• Gërvalla merr pjesë në takimin e ministrave të Jashtëm të BE-së dhe rajonit
• Beogradi reagon pas njohjes së Kosovës nga Sudani